Prosesu konsulta saúde ba Xanana remata ho susesu

DILI (TOP) – Prosesu konsulta saúde ba eis Komandante em Chefe das FALINTIL, Kay Rala Xanana Gusmão remata ona, no la’o ho susesu.

Hafoin Xanana ba konsulta nia kondisaun saúde iha Jakarta, Indonézia povu Timor-Leste direitamente no indireitamente hato’o orasaun ba viajen lider karismátiku ne'e hodi bele to’o fatin destinasaun ho seguru.

The Oe-Kusi Post (TOP) observa reasaun sidadaun sira nia reasaun iha mundu virtual hanesan iha plata forma media sosial (Facebook) kuaje maioria hato’o boa viagem ba Kay Rala Xanana Gusmão. Maibé, observa husi parte politika hamosu “polemika” iha rai laran hodi halo reasaun bankada FRETILIN iha Parlamentu Nasionál ezije ba xefe governu no Ministériu Negósiu Estranjeiru no Kooperasaun (MNEK) tenke demite embaixador Timor-Leste ba Japaun, Ilidio da Costa Ximenes ligadu ba aprezentasaun Kay Rala Xanana Gusmão nian iha Forum Parlamentar Tokyo.

Notisia relevante: Embaixador Ilidio: Ha’u informa buat hotu ba MNEK

Tuir informasaun ne’ebé TOP asesu husi ospital exérsitu Gatot Soebroto katak, prosesu konsulta saúde ba Timor-Leste nia Prezidente Repúblika dahuluk ne’e remata iha loron 20 Novembru 2020. No prosesu konsulta saúde ne’e lidera direitamente husi Ministru Saúde Indonézia doutor Terawan Agus Putranto. Iha biban ne’e mós Kay Rala Xanana Gusmão hato’o nia agradesimentu boot ba doutor Terawan ho nia ekipa médiku espesialista lubuk ida.

Lider Karismátiku Kay Rala Xanana Gusmão nia kondisaun saúde estavél hela. Imajen ne'e nia tur hela iha sala VVIP iha ospital Gatot Soebroto, Jakarta, Indonézia. Foto Espesial.

Notisia relevante: Ministru Saúde Indonézia tun direita konsulta Kay Rala Xanana Gusmão

Hafoin check-up, ekipa médiku espesialista sira ne’e transfere Xanana ba iha sala VVIP hodi almosu no deskansa atu hare progresu ba rekoperasaun saúde.

“Rezultadu hatudu di’ak, nia kondisaun saúde di’ak hela, laiha moras boot ruma,” hateten fontes ida husi ospital Gatot Soebroto ba TOP, Sábadu 21 Novembru 2020.

Entretantu, Laureadu Nobel ba Paz 1996, José Ramos Horta la dúvida ba kapasidade doutor Terawan nian, tanba tuir Horta katak nia rona antes ona kona-ba doutor ne’e.

“Uluk kedas ha’u rona informasaun kona-ba Dr. Terawan nu’udar espesialista boot, di’ak. Tinan 3 liu ba Dr. Terawan maka halo tratamento ba Maun Boot Xanana ho rezultadu di’ak,” hateten Horta via Chatting WhatsApp ba TOP, Sabádu 21 Novembru 2020.

  

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE