DILI (TOP) – Governu liu husi Ministériu Interior (MI) planeia ona atu reativa Border Pass hodi fasilita movimentu sidadaun nasaun rua, Timor – Leste ho Indonézia.
Ministru Intertior, Francisco Guterres hateten, rajaun reativa Border Pass ne’e, tanba Indonézia ho Timor – Leste ne’e iha lasu kultural, iha ligasaun kultural, nune’e tenke dezenvolve ho mekanizmu di’ak hodi bele iha kontaktu diariu ne’ebé bele benefisia komunidade entre nasaun rua.
“Mekanizmu mak ita tenke halo Border Pass, ida ne’e ita tenke haree hodi reativa fali, duke loron-kalan mak pasa porte nu’usa maka ita la dezenvolve mekanizmu simples ne’ebé mak bele ajuda komunidade rua ne’e halo komunikasaun diariu,” Francisco Guterres hatete ba jornalista sira Palásiu Governu, Dili, Kuarta 12 Jullu 2023.
Eis Sekretadu Estadu Seguransa (SES) ne’e esplika, Boarder Pass ne’e uluk hamoos tiha, maibé agora iha nia mandatu ne’e hakarak atu reativa hodi fasilita movimentu komunidade nasaun rua nian. Tanba, komunidade husi Indonézia balun aman moris iha Indonézia, kultura iha Timor, balun iha Timor, nia kultura iha Indonézia.
Governante husi munisipiu Vikeke ne’e katak, ho prosesu reativa border pass ne’e bele minimiza no evita itoan ona tama – sai illegal ne’e.
“Ita sei iha politika atu kontrola kapasidade fronterira, tanba ne’e Polisia Unidade Patrullamentu Fronteira (UPF) para halo kontrolu rigorozu tebes iha ne’ebá. Depois ita sei haree kona-ba kestaun kultura entre nasaun rua ne’e tanba ita nia hakarak ne’e, fronteria iha paz no benefisiu ba Timor – Leste ho Indonézia,” nia esplika.
