DILI (TOP) – Estadus Unidus Amerika (EUA) ho Timor-Leste asina ona Programa Parseria Estaduál liu husi programa ne’e, Rhode Island National Guard (Rhode Island nia Guarda Nasionál) atu hakle’an liu-tan kooperasaun hodi hametin dezenvolvimentu profisionál, formasaun, no interkámbiu sira.
Parseria ne’e mós sei fasilita kooperasaun ne’ebé di’ak liután entre Timor-Leste no Estadu Rhode Island iha setór governasaun, seguransa, ekonomia no sosiál. Asinatura ne’e marka momentu istóriku ida tan iha parseria entre Estadus Unidus Amérika no Timor-Leste no reflete estadu rua nia kompromisu atu espande oportunidade ba povu Timor-Leste hodi hari’i nasaun ida-ne’ebé saudável, seguru no prósperu liután.
Programa ne’e asina husi Komandante U.S. Indo-Pacific Command - Alm. John Aquilino ho Ministru Defeza Timor-Leste, Filomeno Paixão iha Dili.
Jenerál fitun-4, Komandante Komando Indo-Pasífiku Estadus Unidus Amérika Almirante John Aquilino nu'udar ofisiál militár superiór ne'ebé komanda efetivu militár sira husi ramu oioin no funsionáriu sivíl sira Departamentu Defeza nian hamutuk 380,000, no mós ró-funu porta aviaun no aviaun-funu modernu oioin, graduadu husi Eskola Estadu Maiór ba Aviadór TOP GUN, hafoin enkontru kortezia ho PR Ramos Horta, ho jestu umildade la'o ba kumprimenta Guardas Moradores Palàsiu Prezidensiál RDTL nian.
Hafoin asina programa ne’e, Komandante U.S. Indo-Pacific Command - Alm. John Aquilino hala’o sorumutuk produtivu ida ho Primeiru-Ministru Taur Matan Ruak.
Durante sorumutuk ne’e, Alm. Aquilino subliña kompromisu E.U.A. nian hodi halo parseria ho Timor-Leste ho objetivu promove interese no valór hirak ne’ebé mak nasaun rua ne’e kompartilla atu nune’e hari’i rejiaun Indo-Pasífiku ida-ne’ebé nakonu ho dame, estável no prósperu liután.
Nia mós halo diskusaun kona-ba oportunidade sira atu hametin kooperasaun, inklui liuhusi reabilitasaun konjunta ne’ebé la’o hela iha Aeroportu Baukau.
Iha tinan 2023 nia klaran, Estadus Unidus Amérika sei fornese aviaun Cessna modernu ida ba F-FDTL hodi ajuda Timor-Leste halo monitorizasaun di’ak liután ba ninia territóriu, responde ba dezastre naturál sira, no hametin ninia soberania.
Komandante U.S. Indo-Pacific Command Alm. John Aquilino mós hasoru malu ho Prezidente Repúblika José Ramos-Horta iha loron 2 Fevereiru 2023 hodi diskute kona-ba oportunidade sira atu hametin parseria entre Estadus Unidus Amérika no Timor-Leste.
Alm. Aquilino agradese ba Prezidente Ramos-Horta tanba nia fó apoiu maka’as ba Navál Seabees E.U.A. Hahú husi tinan 2009, Seabees hari’i ka reabilita ona projetus 100-resin, inklui eskola no klínika sira ho valór milllaun $60-resin iha Timor-Leste laran tomak.
Liu-husi parseria ne’e, Estadus Unidus Amérika komprometidu atu espande oportunidade ba povu Timor-Leste hodi hari’i nasaun ida-ne’ebé saudável, seguru no prósperu liután.
"Ha’u kontente tebes no ba oin hakle’an liután ita nia kooperasaun, bazeia ba ita ninia hanoin hanesan kona-ba valór demokrátiku no interese komún sira iha rejiaun Indo Pásifiku ida ne’ebé nakloke no livre,” Almirante John hateten ba jornalista sira hafoin hasoru malu ho Prezidente Repúblika, José Ramos-Horta iha Palásiu Prezidensial iha Ai-Tarak Laran, Dili, Sesta 03 Fevereiru 2023.
Kooperasaun ne'ebe iha maka Estadu Unidus Amerika kompromete aan nafatin tulun Timor Lorosa'e iha area seguransa inklui kapasitasaun iha area estratejia militar hodi transforma F-FDTL sai forsa ne'ebe dezenvolvidu iha área hotu.
“Estadus Unidus Amérika mantein kooperasaun seguransa ho Timor Lorosa'e ba tempu naruk. Durante tinan lubuk ita hala’o ezersísiu militár konjuntu sira, promove ba dezenvolvimentu militar no formasaun profisionál inklui reforsa asisténsia humanitária," Almirante John esplika.
Prezensa komandante forsa Indo-Pasifiku Almirante, John C. Aquilino iha Timor Lorosa'e, tanba hetan konvite hosi estadu Timor hodi partisipa seremonia loron transformasaun FALINTIL ba F-FDTL ba dala 22, no, partisipa hodi entrega ekipamentu unidade kuidadu intensivu movel iha Ospital Nasional Guido Valadares ne'ebe mak hetan finansiamentu hosi ajensia internasional USAID ho montante millaun U$ 2.3, ho objetivu kria ekipamentu moderna hodi garante kualidade ba prestasaun servisu saude.
