OELEO (TOP) – Polícia Científica de Investigação Criminal (PCIC) durante halo serbisu maka’as no di’ak tebes iha públiku nia matan, maibé Komandante em Chefe das FALINTIL atual Prezidente Partidu CNRT, Kay Rala Xanana Gusmão halo ona ameasa katak, bainhira CNRT hetan konfiansa mazimu husi povu iha eleisaun parlamentar ne’e sei hamoos hotu kedas membru PCIC sira ne’ebé hatudu atitude ‘bandidu’.
Xanana hatutan, maske okupadu ho serbisu lubuk ida durante ne’e, maibé nia mós sempre halo observasaun balun ba lala’ok serbisu PCIC nian durante ne’e.
“Iha justisa agora, PCIC agora buka de’it ema CNRT para atu tau hotu iha kadeia. PCIC agora hotu-hotu ka’er kilat, ba festa mós ka’er kilat, ha’u dehan wao… wao….depois sira ka’er ema arbiru, mais sira hein, ita manan, ha’u hamoos tiha sira hotu. Sira ne’ebé beik tuur de’it ne’e sei sai hotu,” Xanana hateten assuntu ne’e bainhira hala’o konsolidasaun partidu CNRT nian iha suku Oeleo, munisipiu Bobonaro, Sesta 20 Janeiru 2023.
Komisaun B Parlamentu Nasionál ne’ebé haree ba assuntu defeza no seguransa mós oras ne’e preokupa maka’as kona-ba volume krime homesidu sira ne’ebé akontese iha rai-laran liliu iha kapital Dili.
Ho preokupasaun ne’e, parte Komisaun B iha loron Kinta 19 Janeiru 2023 organiza audiénsia ho Policia Ciêntífica e de Investigação Criminal (PCIC) ho Servisu Nasionál bá Intelijénsia (SNI) hodi ko’alia kona-bá oinsa autoridade polisiál sira bele serbisu hamutuk, tanba to’o oras-ne’e autór prinsipál sei fujitivu (buronan) polisia.
“Audiénsia kona-bá omesidiu sira ne’ebé mosu iha ita nia rain hanesan iha Elemloi no ponte BJ Habibie. Objetivu ida ne’e mak halo ami bolu sira tanba autór sira bá omesidiu ne’e to’o ohin loron la kaptura,” José Agostinho Sequeira “Somotxo” hateten ba jornalista sira Parlamentu Nasionál, Kinta 19 Janeiru 2023.
Somotoxo observa, PCIC durante ne’e ho Servisu Investigação Criminal (SIC), Polisia Nasionál Timor-Leste (PNTL), ‘ladun serbisu hamutuk’. Tánba ne’e mak Komisaun esforsu halo Lei da Organização Investigação Criminal (LOIC) hodi fahe tipulojia de krime.
“Ida ne’e, krime ida ne’ebé mak bá PCIC, no ida ne’ebé mak bá SIC, ne’ebé baibain bolu dehan PNSIK. Mais ida ne’e la eziste ona no muda ona bá SIC. Ida-idak hanesan rai informasaun ka informasaun ne’e tenke fahe bá órgaun polisia de investigasaun kriminal kompetente atu hala’o,” Somotxo hateten.
Kazu omesidiu sona matebian Isaac Hornai Baptisa iha área Delta-Elemloi ne’e mosu iha Sesta (06/01/2023), tuku 02:00, madrugada Otl, iha Aldeia São José Ai-meti Laran, Suku Comoro, Postu Administrativu Dom Aleixo, Munisipiu Dili.
