HATULIA B (TOP) – Forsa Armada ba Libertasaun Nasionál Timor-Leste (FALINTIL) hahu moris iha loron 20 Agustu 1975, no iha loron 20 Agustu 2022 kompleta ona ba tinan 47.
Historikamente, iha loron 10 to'o 11 Agustu 1975, Movimento Anti Comunista (MAC) ne'ebé harii husi UDT lansa golpe iha Dili. Movimentu armada ne’e lidera husi João Viegas Carascalão.
Tanba rona katak, Indonézia sei invade Timor Portugés ho rajaun komunizmu mak movimentu armada MAC, halo golpe hasoru administrasaun Portugéza hodi hatudu ba Indonézia katak, UDT rasik iha kapasidade atu rezolve no halakon komunizmu iha Timor Portugés iha tempu ne'eba. Nune'e evita Indonézia nia invazaun ba Timor Portugés.
Alvu husi movimentu armada MAC mak atu ka’er governante Portugés ne'ebé deskonfia pro-FRETILIN, no mós atu ka’er elementu sira FRETILIN nian ne'ebé iha tendénsia ba ideolojia Marxista-Leninista.
Iha momentu golpe mosu, governador Timor Portugés Lemos Pires iha hela Lospalos, major Jonas iha Ermera no Prezidente FRETILIN Francisco Xavier do Amaral iha Aileu. Enkuantu membru CCF sira hanesan Nicolau Lobato, Mari Alkatiri, Alarico Fernandes no sira seluk iha Dili. Depois ikus mai iha 13 Agustu mak sira foin sa'e ba Aisirimou, Aileu. Razaun sira muda ba Aisirimou tanba Aisirimou mak hanesan baze ba primeira brigada revolusaun FRETILIN nian.
Movimentu armada UDT nian MAC halo asaltu ida ba Kuartel Polisia Portugés (atual pusat kebudayaan Indonesia nian) hodi prende kilat no kaer Tenente Koronel Magiolo Gouveia. Hafoin ida ne'e, sira hahú domina fatin importante no estratejiku sira iha Dili momentu ne'eba.
Movimentu armada UDT nian ne'e mós ka’er tiha militante, apoiante no dirijente sira FRETILIN nian hodi ba kastigu iha Caserna Palapaço.
Dirijente no membru CCF nian ne'ebé movimentu armada UDT nian MAC kaer altura ne'eba hodi ba dadur iha Kuartel Polisia Portugés nian mak hanesan Vicente Reis, Guido Valadares no José Sequeira.
Kay Rala Xanana Gusmão mós kaptura iha momentu ne'eba maibé nia sei hanesan simpatizante baibain FRETILIN nian. Xanana Gusmão foin sai membru loloos Comite Central FRETILIN nian iha meadu Outubru hodi asume kargu hanesan Adjuntu ba Departamentu Informasaun nian.
Nascimento FALINTIL iha loron 20 Agustu 1975 ne’e momentu historiku ne’ebé nia valor as tebes ba povu Timor-Leste no ba história funu ba libertasaun nasionál, tanba FALINTILmak liman kroat povo Maubere nian, ohin loron nakfilak sai liman kroat povu Timor-Leste nian, FALINTIL mak hanesan fatuk inan “Pedra angular” ba aliserse RDTL, FALINTIL maka salvador ba FRETILIN iha 20 Agosto 1975.
Sekretariu Jeral Partidu CNRT, Francisco Kalbuadi Lay maske oras ne’e hala’o hela agradesimentu no konsolidasaun partidu CNRT ho maratona iha teritoriu nasionál, maibé lahaluha hodi halo komemorasaun simples ba loron historiku ne’e hamutuk ho nia militante no simpatizante sira hahu kedas iha loron Sesta 19 Agustu 2022 iha suku Rairobo, postu Atabae, munisipiu Bobonaro, no mós iha postu Hatulia B, munisipiu Ermera iha loron Sábadu 20 Agustu 2022.
“Ohin loron ida importante tebes, tanba FALINTIL halo ona tinan 47. Mai ita hotu fó Viva ba FALINTIL, Viva ba asuwain sira hotu. Barak mak sakrifika sira nia aan tomak ba ita nia ukun rasik aan para ohin ita hotu iha ne’e para bele goza ita nia ukun rasik aan,” Sekretariu Jeral Partidu CNRT, Francisco Kalbuadi Lay hamutuk ho estrutura CNRT iha postu Hatulia B, Ermera fó Viva ho lian maka’as ba FALINTIL no asuwain sira hotu molok hahu seremonia agradesimentu no konsolidasaun partidu ne’e, Sábadu 20 Agustu 2022.
Kalbuadi Lay hatutan, FALINTIL barak mak ohin loron sei moris hela, no husu ba Maromak hodi kontinua fó isin di’ak ba sira hodi bele goza netik ukun rasik aan ida ne’e, no husu mós ba Aman-Maromak hodi fó fatin di’ak ba FALINTIL sira ne’ebé mate ona hodi bele hela ho hakmatek no dame iha Aman-Maromak Nia Kadunan Santu.
