DILI (TOP) — Vise Minsitu Interior (MI), António Armindo hateten, siguransa liu-liu ba Polisía Nasionál Timor-Leste (PNTL) maka menus hela iha Fronteira tanba ne’e maka sasan illegal tama barak mai Timor Leste (TL) kada loron.
Governante ne’e dehan, hare ba kestaun kada loron ekipa konjunta Fronteira sempre halo kapturasaun ba sidadaun hatama sasan illegal kada loron iha liña Fronteira tanba siguransa hanesan membru Polisía Nasionál Timor-Leste PNTL destakadu iha postu sira iha baliza la naton atu kontrola.
“Kona-ba sasan ilegal sira ne’ebé maka durante ne’e tama hela de’t ne’e, tanba ita bo’ot sira hare maske liu liu ha’u atu ko’alia parte Ministériu Interior nian, hanesan seguransa ne’ebé maka koloka iha iha Fronteira naturalmente Ita nia membru sira maka la to'o atu kontrola,” Vise Ministru Interior Antonio Armindo hato’o kestaun ne’e bainhira jornalista sira intervista kona-ba sasan illegal tama barak mai Timor Leste, hafoin partisipa iha reuniaun Konsellu Ministru (KM) iha Palásiu Governu, Dili, Kuarta 20 Jullu 2022.
Vise Ministru Interior Antonio Armindo hato’o kestaun ne’e, tanba hare ba realidade ne’ebé kada loron ekipa serbisu iha liña fronteira sempre halo kapturasaun ba sidadaun Timor oan sira ne’ebé durante ne’e hala’o negosiu ka hatama sasan ilegalmente liu liña Fronteira kada loron.
Vise Ministru Interior ne’e argumenta, iha tinan ida ne’e, aumenta tan postu hanesan dadauk inagura ona públiku hatene, maibé presiza membru ne’ebé maka sufsiente atu bele koloka ba iha ne’ebá hodi bele hala’o servsiu ne’ebé maka di’ak.
Governante ne’e esplika, tanba kestaun nesesidade uma laran nian, entaun sidadaun sira ne’ebé maka hela besik Fronteira ne’e tenki liuhusi dalan illegal sira nune’e hodi buka moris.
“Dalabarak hahalok sira ne’ebé sidadaun sira pratika dalan illegal maka bainhira hare seguransa iha fatin ne’e sira la la’o, mais Seguransa laiha ona maka sira foin atu la’o,” nia hateten.
Vise Ministru Interior ne’e dehan, nia parte sei hare kona-ba kestaun hirak ne’e, haruka ona ekipa ida destaka ba iha Fronteira atu hare, keta halo ba iha autoriedade seguransa balun maka apoiu atividades sira ne’e tama ilegal hanesan ne’e.
“Tanba ne’e, ita seidauk hetan relatoriu maibé ita espera katak iha tempu badak sei iha relatoriu para ita haree oinsa maka ita atu halo di’ak liutan,” nia esplika.
Governante mai husi partidu Kmanek Haburas Unidade Timor Oan ne’e akresenta, maske nune’e nia parte rekoñese, naturalmente buat ida ilegal iha ne’eba halai liu ba iha nesesidade komersiu nian, tanba sidadaun sira ne’ebé mak hela iha Fronteira sira moris ne’e depende liu ba iha sasan ilegal sira, hanesan ba sosa Mina iha sorin mai faan fali iha sorin tanba husi sorin baratu liu no mai faan fali iha sorin nine’e sira bele hetan osan naturalmente Ida ne’e maka akontese.
“Maibé ha’u fiar husi Sekretariu Estadu Kooperativa (SECOOP), Sira bele halo hela esforsu lao haleu Fronteira Sira atu oinsa maka Ita bele halo merkadu Ida ne’ebé maka kontrola husi governu rua Indonesia ho TL.”
Nia hatutan, kona-ba kestaun sansaun ba sidadaun ilegalmente Sira ne’e,governante ne’e hateten, preokupa tebes kona-ba ida ne’e, maibé ne’e kompetensia ona ba iha tribunal ka Ministeriu publiku, naturalmente kuandu halo kaptura Polisia halo Investigasaun depois hato’o ba iha Ministeriu Públiku (PM) maka hare ninia prosesu.
