DILI (TOP) – Autoridade judisiariu sira liu husi Policia Ciêntifica de Investigação Criminal (PCIC) kontinua notifika jornalista sira iha Timor – Leste inklui Xefe Redasaun jornal The INDEPENDENTE, Jorgino dos Santos.
Jorgino dos Santos hetan notifikasaun husi PCIC atu sai nu’udar sasin ba notisia krime ida ne’ebé públika iha jornal The INDEPENDENTE.
Diretor ezekutivu jornal diariu The INDEPENDENTE, José Sarito Amaral hateten nia Xefe Redasaun Jornál The INDEPENDENTE hetan karta notifikasaun ida husi PCIC ho nia status mak atu sai sasin ba krime violasaun ba segredu justisa.
"Tanba ne'e mak Jornál The INDEPENDENTE husu ba autoridade tomak, liu-liu Konsellu Imprensa, ho asosiasaun jornalista sira atu oinsá tau atensaun ba kazu ne'e, para iha futuru la bele akontese tan ba ami nia jornalista sira, Konsellu Imprensa la bele dukur, tanba notifkasaun ne'e hanesan presaun psikolijia ba jornalista sira hotu. Tanba ne'e ohin ami mai kumpri karta notifikasau ne'e," Diretor Ezekutivu José Sarito Amaral hateten ba jornalista sira iha edifisiu PCIC, Kinta 30 Fevereiru 2023.
Nia hatutan, kona-ba prosesu tanba saida maka to'o mai iha PCIC, liga ba publikasaun jornál independente ninian iha loron 10 fevereiru tinan ida ne'e, kona-ba kazu longuinhos Monteiro ninian ne'ebé, ekipa entidade sira halo buska ba iha nia rezidensia.
"Kazu ne'e akontese iha dia 09 fevereiru ami públika iha dia 10, depois liu tiha semana rua prosesu inisial ne'e, mai husi gabinete Prezidensial Repúblika ninian, asinadu husi nai Prezidente Repúblika José Ramos Horta, lori ba Ministériu Públiku pasa fali ba PCIC, nune'e maka notifika ami hodi husu informasaun no evidensia ne'ebé buska Longuinhos Monteiro ninian. Tanba ne'e maka ami fó karta hodi responde hodi halo aneksasaun, publikasaun iha loron 09 fulan fevereiru tinan 2023," nia informa.
Nia haktuir tan, prosesu la'o hela parese tribunal ka Ministeriu Públika delega fali ba PCIC, tanba ne'e ohin xefe relasaun mai atu presta deklarasaun ruma hodi rona informasaun ne'e. Maibé infelismente, sira mai ho Publikasaun ne'e hodi responde karta ne'e.
Nia esplika, kontestu publikasaun ne'e atu viola lei ka la viola lei ne'e kompetensía PCIC ho tribunal ho Ministeriu Públiku.
"Maibé kontestu ne'e ami la halo violasaun ida, tanba ami iha terenu haree ho matan, rona ho lilun, saida maka akontese iha terenu, ida ne'e maka ami hakerek, ami la inventa, sei ami inventa, ami sala", nia dehan.
Nia hatene, loloos ne'e tuir prosesu tuir lei komunikasaun sosiál ne'e, kona-ba kazu sivil liga ba publikasaun hotu-hotu, maibé agora kategoria fali publikasaun ne'e ba krime.
Nia informa, kontenstasaun ne'e tuir informasaun ne'ebé sira asesu katak husi Gabinete Prezidente Repúblika mak remete ba Ministériu Públiku.
"Prontu ami koopera ho entidade hotu-hotu, maibé kazu ida ne'e la'ós foun, ida ne'e akontese beibeik ona, tanba ne'e ha'u dezafia Konsellu Imprensa, ami respeitu mós lei komunikasaun sosiál, sai nu'udar espesialista, ne'e ami kumpri lei ida ne'e, tanba ne'e loloos ne'e PCIC ne'e la'ós ami nia fatin, ami nia fatin maka Konsellu Imprensa atu esplika situasaun sira ne'e" nia esplika.
Iha fatin hanesan, Sekretáriu Jerál Timor-Leste Pres Uniaun, Zezito da Silva katak, nia prezensa iha edifisiu PCIC ne’e atu fó nia solidaridade ba Xefe Redasaun Jornal Diariu The INDEPENDENTE.
"Ami sente triste, tanba jornalista sempre mai hola prezensa iha PCIC ka orgaun judisiariu sira, maibé ita iha lei komunikasaun sosial, ita nunka respeita ida ne'e," nia kestiona.
Sekretáriu jerál TLPU ne'e la kokonrda ho notifikasaun ne'ebé iha, tanba karta notifikasaun ne'e jornalista tenke livre hodi halo kobertura atu foka sai informasaun ba lian la’ek sira.
Nia esplika, ko'alia kona-ba segredu justisa, la'ós jornalista mak fó sai, maibé ema ne'ebé mak fó sai segredu justisa ne'e ema ne'ebé mak ko'alia, jornalista públika de'it.
Nune'e mós Xefe advokasia Asosiasaun Jornalista Timor Lorosa'e Costancio dos Santos Viera, haktuir, kona-ba kazu ida ne'e tuir sasin Xefe Redasaun mai presta deklarasaun.
"Tuir ita nia lei komunikasaun sosiál, loloos mak ida ne'e, entaun se ema ne'ebé mak sente katak jornalista nia produtu laiha balansu ka sala, tenke bazeia ba ita nia lei hodi fó para nune'e nia labele sente vitima ba notisia ida ne'e tenke hato'o karta ba redasaun, hodi nune'e sira bele halo rektifikasaun atu nune'e, bele resposta notisia ne’e iha balansu," nia esplika.
