DILI (TOP) – Bankada KHUNTO iha Parlamentu Nasionál konsidera bankada opozisaun FRETILIN no bankada CNRT laiha seriedade hodi luta hasoru korupsaun iha rai-laran, tanba to’o oras ne’e seidauk hetan solusaun ka seidauk hetan konsensu ba nomeasaun komisaun foun ba instituisaun Komisaun Anti-Korupsaun ne’ebé harii husi governasaun CNRT iha tinan 2009.
Komisaun Anti-Korupsaun nu’udar polisia espesializada iha área kriminaldade korupsaun. Artigu 3 (2) Lei Nú. 8/2009 kona-ba Kriasaun Komisaun Anti Korupsaun (KAK/CAC) abtribui KAK ho estatutu nu’udar orgaun polisia kriminal espesializada iha área korupsaun. Nu’udar orgaun polisial espesializada iha área korupsaun, KAK so iha deit dever sujeita ba orientasaun no ordem husi Ministériu Públiku.
"Kuandu ita haree ba nia implementasaun kuandu kleur demais signifika bankada boot rua ne'e sira nia seriedade atu kombate korrupsaun ne'e la iha," hateten deputadu KHUNTO, Luis Roberto ba jornalista sira iha Parlamentu Nasionál, Kuarta 18 Outubru 2023.
Nia hatutan, se bankada boot rua ne'e, haree ba instituisaun KAK ne'e importante ba rai ida ne'e, sira iha seriedade polítika hodi hili lideransa ida, atu haree ba serbisu korrupsaun iha rai laran.
Bankada KHUNTO mós dezafia FRETILIN ho CNRT atu la'o hamutuk tanba hetan votus barak husi povu, no mós kadeira barak liu iha Parlamentu Nasionál.
Nia dehan, nomeasaun Komisariu KAK ne'e proposta husi Governu, maibé lejimitidade tenke fó votu maioria husi Parlamentu Nasionál.
"Maibé polítika Parlamentu Nasionál ne'e, ami bankada ki’ik sira liu-liu bankada boot rua FRETILIN ho CNRT ne'e sira nia negosiasaun polítika dala ruma han malu, ita bele dehan sira vinga -malu tanba dezde VIII Governu, haruka komisariu ida mai mós CNRT la fó ulun, sira walk out hela de'it, entaun karik ida ne'e mak maluk sira husi FRETILIN hanoin fali ida ne'e, maibé ida ne'e mós ami la hatene," deputadu Luis esplika.
Hatan ba kestaun ne’e, Xefe Bankada CNRT, Deputadu Durante Nunes katak, lider bankada rua ne’e hamutuk tiha ona.
"Seriedade ne'e oinsá loos, iha seriedade mak ita tuur hamutuk ko'alia tiha, agora fila-fali ba Governu," deputadu Durante esklarese.
Nia hatutan, parte FRETILIN konkorda tiha ona ho figura ka kandidatu ida de’it, maibé ida ne’e depende ba desijaun husi governu.
Nia dehan, bankada FRETILIN ejize katak, tenke konsensu agora iha plenaria ne'e votu sekretu deputadu ida-idak ninian.
“Ne'e mak sira prefere ida de'it mak mai, Governu mak tenke hato'o fali ida de'it ba Parlamentu Nasionál. Ejizensia ne'e ami ko'alia ona ho Vise Ministru Asuntu Parlamentár atu aprezenta iha reuniaun konsellu Ministru," katak Deputadu Duarte Nunes.
Bankada CNRT mós apoiu ejizensia bankada FRETILIN nian hodi husu Governu aprezenta figura ida de'it mak foin iha konsesu iha Parlamentu Nasionál.
"Ami ne'e apoiu Governu, kuandu haruka ida mai, ida ne'e maka ami apoiu, ne'ebé ami laiha problema. Bankada FRETILIN dehan ita ba vota, entaun ita vota," deputadu Duarte esplika.
Kona-ba preferensia figura Komisariu KAK nian, entre bankada FRETILIN ho CNRT seidauk bele fó sai naran, maibé hein Governu aprezenta tan ba Parlamentu Nasionál mak foin bele hatene loloos figura ne'e.
Primeiru-Ministru, Kay Rala Xanana Gusmão aprezenta Projetu Proposta Rezolusaun Parlamentu Nasionál iha reuniaun Konsellu Ministru iha loron 13 Setembru liu-ba.
Xefe Governu propoin naran rua mak Sérgio de Jesus Fernandes da Costa Hornai ho Rui Pereira dos Santos ba Parlamentu Nasionál (PN) atu hili se mak votu barak liu hodi asume kna’ar nu’udár Komisariu foun ba KAK.
