DILI (TOP) – Governu liu husi Ministériu Turizmu no Ambiente sei estabelese kooperasaun ida iha tempu oin mai hodi ajuda halo kapasitasaun área tolu hanesan, hotel, hospitalidade no ekonomia azul.
Ministru Turizmu no Ambiente, Francisco Kalbuadi Lay konsidera área tolu ne'e importante tebes ba Timor-Leste hodi fó kapasitasaun ba joven Timoroan sira, no mós dezenvolve ekonómia iha rai-laran.
Durante enkontru entre Ministériu Turizmu no Ambiente ho Institutu Camões iha konkordansia lubuk tuir planu sei asina akordu kooperasaun ida iha tinan ida ne'e nia laran.
"Ohin mai vizita ami halo akordu lubuk ida mai fulan ida-rua nia laran liu-liu kona-ba área hotelaria, hospitalidade, rekursu humanu, ko'alia itoan mós kona-ba ekonomia azul," Ministru Turizmu no Ambiente, Francisco Kalbuadi Lay hateten ba jornalista sira iha Farol-Dili, Kinta 09 Maiu 2024.
Governante ne’e rekoñese Institutu Camões ninia kooperasaun bilateral ne’e la’os iha Timor-Leste de’it, maibé eziste mós iha nasaun membru CPLP sira seluk iha mundu.
Iha fatin hanesan, Prezidente Institutu Camões, Ana Fernandes sente kontente tebes tanba, bele marka sorumutu ida ho Vise-Primeiru Ministru, Ministru Koordenador ba Assuntu Ekonómiku, Ministru Turizmu no Ambiente, Francisco Kalbuadi Lay.
Nia hatutan, enkontru ne’e ko’alia kona-ba oinsa atu bele halo tiha kooperasaun ida entre Timor-Leste ho Portugal liu husi Institutu Camões ne’ebé liga ba ekonomia azul, hotelaria, no hospitalidade.
Nia dehan, bainhira estabelese ona akordu kooperasaun ne’e nia garante sei loke kampu serbisu foun barak ba Timoroan sira.
"Ami iha ne'e atu responde prioridade sira ne'ebé mak iha ba governu Timor-Leste ba área importante sira ne'ebé mak iha hodi dezenvolve ekomonia atu bele kria kampu serbisu ba joven Timor-Leste."
