CNRT no PD konkorda malu ona aloka osan ba projetu Greater Sun Rise

DILI (TOP) – Partidu CNRT no Partidu Demokrátiku (PD) konkorda atu aloka osan iha kapital dezenvolvimentu ba Projetu Tasi Mane atu reativa prosesu preparasaun ba Greater Sun Rise (GSR) ne’ebe iha governu liu-ba la fó importánsia no atensaun.

Governu atual ne’ebé kompostu husi Partidu CNRT no Partido Demokrátiku (PD) realiza ona reuniaun alargada atu konsolida ideia hamutuk kona-ba proposta Orsamentu Jeral Estadu 2025.

Reuniaun ida-ne’e lidera husi Prezidente Partidu CNRT ho kualidade hanesan Primeiru-Ministru IX Governu Konstitusionál, Kay Rala Xanana Gusmão hamutuk ho Presidente Partidu Demokrátiku ho kualidade núdar Vise-Primeiru-Ministru Mariano Assanami Sabino Lopes iha CCD, Segunda 04 Novembru 2024.

Prezidente Partidu CNRT atual Primeiru-Ministru Kay Rala Xanana Gusmão lidera hela enkontru alargada ida entre CNRT ho PD iha CCD, Segunda, 4 Novembru 2024.

Tuir Komunikadu ba Imprensa husi partidu rua ne'e katak, hafoin halo diskusaun naruk no kle’an, Partidu CNRT no Partidu Demokrátiku konkorda ho pontu sira hanesan tuir mai:

  1. Partidu CNRT no Partidu Demokrátiku konkorda atu foku liuba kualidade ezekusaun, la’os hare de’it ba taxa ezekusaun;
  2. Partidu CNRT no Partidu Demokrátiku sei kontinua tau ba prátika slogan katak Partidu-rua ne’e forma governu la’ós atu ukun maibé atu serbii, nune’e sei kontinua mantein servisu di’ak ne’ebe atinje ona iha 2024 no hadi’ak liutan servisu balun iha 2025;
  3. Partidu CNRT no Partidu Demokrátiku sei kontinua aloka osan no implementa programa sira iha setor produtivu no setor estratéjiku sira atu nune’e nafatin garante estadu nia sustentabilidade fiskal iha futuru;
  4. Partidu CNRT no Partidu Demokrátiku konkorda atu aloka osan iha kapital dezenvolvimentu ba Projetu Tasi Mane atu reativa prosesu preparasaun ba Greater Sunrise ne’ebe iha governu liuba lafo importánsia no atensaun;
  5. Konsidera mós prosesu burokrasia ne’ebé naruk iha jinastíka aprovizionamentu nian nune’e impede aselerasaun de ezekusaun kategoria orsamentu iha kapital dezenvolvimentu nian, Partidu CNRT no Partidu Demokrátiku sei reforma sistema aprovizionamentu hodi aselera dezenvolvimentu ba povu.
  6. Partidu CNRT no Partidu Demokrátiku sei kumpre kompromisu eleitoral atu hadi’ak erru sira ne’ebe akontese iha Governu liuba, tanba ne’e sei fo apoiu masimu ba prosesu auditoria husi auditor internasional ne’ebe la’o daudauk ona;
  7. Partidu CNRT no Partidu Demokratiku konkorda atu investe liután iha Rekursu Umanu setor judisiária nian atu reforma no hadi’ak setor refere hodi harii sosiedade ne’ebe justu iha kurtu no longu prazu.

Ikus liu, Partidu CNRT no Partidu Demokrátiku konsidera 2025 núdar tinan ba implementasaun kompromisu IX Governu Konstitusionál, tanba tinan 2024 konsentra liu-ba esforsu sira atu hatuur hikas sistema finanseira ne’ebé naksobu, kurije erru sira, no halo auditória nune’e asegura katak povu nia osan tenke jere ho di’ak.

 

 

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

Online Counter