DILI (TOP) — Governu dasia ne’ebé lidera husi Primeiru-Ministru (PM), Kay Rala Xanana Gusmão deklara ona ba públiku katak, avaliasaun prestasaun serbisu ba membru governu sira importante duni hodi presta serbisu kualidade ba públiku, maibé importante liu mak tinan ida ne’e governu sei konsentra maka’as liu ba hamoos fo’er sira ne’ebé governasaun daualu ka governu anterior husik hela.
PM Xanana hatutan, ninia governasaun iha tinan ida ne’e sei bele la’o lais no la’o maka’as basa fo’er sira ne’ebé governu anterior husik hela ne’e sai sabraut loos nune’e presiza organiza halo didi’ak, rai iha ida-idak nia fatin ho loloos mak foin konsentra ba serbisu loloos nian iha tinan oin, 2025.
PM Xanana mós akompaña reasaun husi parte opozisaun sira hahu lansa ona informasaun falsu iha plata-forma media sosial kona-ba estrutura foun governu nian bainhira mosu no akontese remodelasaun, maibé tuir nia katak, avaliasaun ba membru governu sira nafatin komunika ba malu serbisu iha kada sorumutu Konsellu Ministru (KM), iha Palásiu Governu.
“Susar atu responde, ha’u temi tiha ona ida ne’e, maibé ha’u hakarak hateten tan fila-fali katak, governu ida-ne’e atu serbisu loloos só iha 2025 tanba, buat sira ne’ebé agora, loron ida ami hanoin katak fó hanoin itoan, maibé fo’er ne’e barak liu fali lixu ne’ebé agora iha Dili ne’e,” PM Xanana hatan ba pergunta jornalista sira nian kona-ba assuntu remodelasaun iha Palásiu Prezidensiál Nicolau Lobato Aitarak-Laran, Dili iha loron Kinta 04 Abríl 2024.
Xefe Governu ne’e esplika, meius atu haloos no hamoos governu anterior nia fo’er sira mak governu atual hasai ona desijaun ida liu husi reuniaun Konsellu Ministru sira iha fulan Janeiru liu-ba hodi halo auditoria ba ministériu ida-idak atu buka tuir Orsamentu Jeral Estadu sira ne’ebé deskonfia hasai no gasta arbiru de’it iha governu anterior.
PM Xanana fó ezemplu ida de’it katak, kona-ba problema iha rai laran, Prezidente Repúblika ko’alia merenda eskolár, ne’e loos. Maibé, governu simu problema lubuk nune’e tenke rezolve, tanba ne’e mak nia PM Xanana tenke esplika ba PR Horta.
Xefe Governu ne’e esplika, merenda eskolár ne’ebé governu anteriór dehan katak, eskola tenke iha konta bankária no iha fatin balun labarik sira la simu merenda eskolar tanba, osan sai ema boot balun uja osan ne’e ba sosa fali karreta.
“Estatál agora halo oinsa. Semana-semana imi husu avaliasaun, mas semana-semana mós ha’u hatan katak, ami sei hamoos, sei hadi’a foer ne’ebé iha,” PM Xanana esplika.
PM Xanana haktuir, kona-ba ho preokupasaun husi Prezidente Repúblika ne’ebé hateten nesesáriu atu halo avaliasaun dezempeñu, no ida ne’e loos, maibé membru governu sira halo hela sira nia serbisu no ezekuta mós orientasaun kona-ba oinsa atu hadi’a, no hamoos fo’er sira iha ministériu sira katak, tenke halo auditoria tanba bainhira halo serbisu de’it iha fo’er iha leten ne’e susar.
Durante enkontru semanal ne’e, PM Xanana informa ba Xefe Estadu kona-ba Sekretáriu Jerál ASEAN nian.
“Susar tebes tanba buat ne'e la'os ki’ik, horseik halo lansamentu ba Programa Lideransa Futuru Timor-Leste ba Programa ASEAN ho joven 100 hodi prepara, tanba ita presiza duni Edukasaun Sivika Sidadania nian, no mós problema valor hodi hadia abilidade,” PM Xanana esplika.
