DILI (TOP) - Orsamentu Ministériu Agrikultura, Pekuária, Peskas no Florestas (MAPPF) ba tinan 2027 sa’e ba U$25.197.101, boot liu orsamentu 2026 ne’ebé hamutuk U$22.450.883. Diferensa ne’e mak U$2.746.218, ka besik 12,2%.
Konsellu Ministru aloka no aprova ona montante ne’e. Maske nune’e, Ministru Marcos “Mameta” da Cruz, dehan orsamentu ne’e seidauk kobre ekipamentu no fasilidade ne’ebé Ministériu planea. Ministériu sei halo ajustamentu molok lori proposta ba plenária Parlamentu Nasionál.
Ministru hato’o informasaun ne’e depois aprezenta ezekusaun Orsamentu Jerál Estadu (OJE) 2026 no planu orsamentu 2027 ba Komisaun D, hamutuk ho Sekretáriu Estadu Pekuária, Peskas no Florestas.
“Orsamentu ne’ebé aloka mai ami ne’e la kobre fasilidade ka ekipamentu ne’ebé ami mensiona. Ne’ebé ami sei esforsu halo ajustamentu molok lori ba plenária ne’e bele ajusta ona. Tanba ami hato’o ona ba deputadu sira iha Komisaun D, sira mós konkorda hodi fó apoiu ba Ministériu nia ajustamentu ne’e,” dehan Ministru.
Aumentu millaun U$2,7: tuir númeru oficiál
Komparasaun ne’e mai husi kalkulasaun ba númeru rua ne’ebé Ministru aprezenta: orsamentu 2026 (U$22.450.883) no orsamentu 2027 (U$25.197.101). Ministru la hatete aumentu ne’e ho porsentu iha audiénsia.
Ba 2027, orsamentu fahe ba kategoria lima:
- Saláriu no vensimentu:U$7,1 millaun (mantein)
- Bens no servisu:U$2,6 millaun
- Transferénsia públika:U$30.600 (mantein)
- Kapitál menór:U$1,8 millaun (redús)
- Kapitál dezenvolvimentu:U$2,96 millaun
Ministru rekoñese katak bens e servisu hetan aumentu, maibé kapitál menór redús ba U$1,8 millaun.
Aumentu la sufisiente ba ekipamentu
Ministériu sei ajusta total orsamentu tuir kategoria ida-idak, liuliu kapitál menór no bens e servisu. Ajustamentu ne’e atu Ministériu bele kontinua sosa traktór boot, hand traktór, máquina koa hare no máquina kuda hare. Iha área peskas, Ministériu mós presiza sosa tan ró ba peskadór sira.
Ministériu mós seidauk bele determina montante ba programa sosa karau. Ida ne’e depende ba rezultadu negosiasaun ne’ebé Sekretáriu Estadu Pekuária sei halo iha 21 Outubru ho Governu provínsia Bali. Montante finál ba kategoria ida-idak sei ajusta molok aprezenta ba plenária.
Ezekusaun 2026: 74,1% to’o 16 Outubru
Ba orsamentu 2026 (U$22.450.883), ezekusaun to’o 16 Outubru hamutuk 74,1%, kompostu husi despeza aktuál no obrigasaun. Ministru informa katak Ministériu sei iha saldu 22%, no iha fulan rua ikus tinan ne’e sei halo esforsu liutan atu ezekuta osan ne’ebé sei restu.
“Iha fulan rua mai ne’e, ami ko’alia ona atu halo jestaun hodi bele ezekuta hotu orsamentu sira ne’e ho di’ak,” tenik Ministru.
