LOIHUNU (TOP) — Kampaña eleitoral ba eleisaun parlamentar besik dadauk ona, no militante ho estrutura partidu KHUNTO nian iha fatin barak mós hahu halo ona afiliasaun ba partidu seluk, tanba sira rasik mak la fiar ona juramentu ne’ebé habosok de’it sira, no alega nakonu ho esplorasaun.
Ijemplu ida mak Koordenador partidu KHUNTO munisipiu Vikeke, Agustinho Soares ho nia membru lubuk ida iha suku Loihunu, postu Ossue, munisipiu Vikeke halo ona deklarasaun nakloke hodi afilia ba partidu CNRT, tanba sira fiar katak, so partidu CNRT mak iha programa no misaun klaru ne’ebé hatuur nanis ona iha Planu Estratejiku ba Dezenvolvimentu Nasionál (PEDN) atu lori rai ne’e ba oin, no hasai povu husi nakukun ba naroman.
Eis Koordenador KHUNTO ne’e konta, Konseleiru Masimu KHUNTO, José dos Santos Bucar duni mak ezije atu nia kaben Armanda Berta dos Santos tenke sai Primeiru-Ministru bainhira povu fó fiar ba KHUNTO iha eleisaun hirak ba kotuk.
Nia sei lembra, José Bucar kuandu uluk sa’e iha palku kampañia nia hateten nia nu’udar konsileiru masimu partidu KHUNTO ba kandidata aan ba aldeia ida la liu, maibé lori partidu KHUNTO sei hetan asesu ba iha Parlamentu Nasionál.
“Ohin loron partidu KHUNTO asesu iha Parlamentu Nasionál, nia ejize prezidente partidu KHUNTO Armanda Berta do Santos tenke ba kadeira Primeiru Ministru, sei la fó tenke fó vise Primeiru Ministru, nia mós hakarak fó Ministériu Solidaridade Sosial no Inkluzaun, Taur fó maibé to’o ikus mai nia ko’alia aat fali Xanana katak, Xanana lanu mak ko’alia,” hateten Agustinho Soares iha atividade konsolidasaun partidu CNRT nian iha suku Loihunu, Postu Administrativu Ossu, munisipiu Vikéké, Domingu 26 Marsu 2023.
Nia hatutan, iha demokrasia diferensia politika ne’e normal hela, tanba konsitusaun RDTL ne’e mak preve duni multi-partidarizmu iha Timor-Leste. Rai ki’ik ne’e la’os estadu unitariu, maibé Estadu Direitu no Demokrátiku, tanba ne’e bainhira entre lider partidu politiku sira Kritika malu kona-ba sira nia lala’ok ukun ne’e normal hela.
“Maibé ataka fali pessoal ne’e mak labele, sente fuan no laran moras tebes bainhira José Bucar hateten fali Xanana lanu mak ko’alia,” nia hateten.
Agustinho mós informa ba estrutura CNRT nian iha postu Ossu katak, nia mak uluk lori KORKA tama ba iha Vikeke no fatin balun tan.
Ho ida ne’e, nia garante katak, ninia membru balun tantu husi KORKA no KHUNTO nian iha Vikeke no Baukau sei halai hotu tuir nia tama ba CNRT iha eleisaun parlamentar ne’e.
