DILI (TOP) – Oan mane na’in-tolu husi jerasaun Lider Istóriku, Kay Rala Xanana Gusmão mak hanesan Alexandre Gusmão, Kay Olo no Dany Gusmão ne’ebé ho naran badak “Al-Kay-Da” entrega karreta rua ba Komunidade Irmãs Fransiscana Taibesi no Madre Eskola Católica Henricus- Leven Luak Manufahi hodi ajuda sira nia misaun evanjelizasaun lor-loron.
Karreta ho marka Carry mutin ne’e oferese husi oan husi “Al- Kay-Da” ne’ebé sosa iha Empreza Bandido Qualidade hodi fasilita irmãs sira bele uza hala’o atividade relizioju.
Alexandre Gusmão entrega hela dokumentu no xave kareta ba madre sira.
Asistensia Irmãs Fransiscana Taibesi Me. Archana Kumari Chinnappa ho kontente hato’o agradese ba Xanana ho nia oan na’in tolu apoia karreta ne’e nu’udar grasa murak ida ba sira.
“Ba Alex, Kay Olo, Dani no Avo obrigada barak ba imi nia ajuda, transporte ida ne’e sei ajuda ami nia misaun serbisu iha Timor, tanba ami transporte la iha, bainhira avo mai vizita ami, nia husu imi presiza saida?. Ami fó hatene, lakleur ohin nia mai oferese ami haksolok no agradese tebes ba Na’i Maromak, ami la iha buat ida, maibé ami hasa’e de’it orasaun ba Na’i Maromak no reja nafatin ba Na’i Maromak atu tulun nia atividade tomak, saúde di’ak ba nia ho nia familia no povu tomak,” madre agradese.
Iha fatin hanesan,Kay Olo Gusmão dehan, apoiu nu’udar kbiit ida husi saida mak sira hetan hodi tulun madre sira bele uza ba sira nia atividade lor-loron.
Alexandre Gusmão hamrik iha liur taka sapeo ne'e, no nia alin Kay Olo Gusmão ho madre tuur iha kareta laran.
“Apoiu ida ne’e bele tulun madre sira sira nia serbisu lor-loron, ida ne’e sai orgullu ba ami bele hare no ajuda madre atu uja karreta ne’e,” tenik nia.
Iha loron Domingu, 19 Fevereiru 2023, Alexandre Gusmão, Dani no Kay Olo Gusmão lori mós karreta ba entrega iha Diretora Eskola Katolika Henricus-Leven Luak- Same.
“Lori kongregasaun nia naran, ami hato’o agradese no obrigado wain ba Avo ninia oan nain rua, Kay Olo no Daniel, mezmu Daniel la mai, maibé agradese hodi tulun alin sira orfonatu,” Me. Esperansa agradese.
Alexandre Gusmão (taka sapeo) ho nia alin Kay Olo Gusmão hasai foto hamutuk ho madre sira.
Nia dehan, sira la iha buat ruma atu fó ba Kay Rala Xanana Gusmão nia familia, maibé hasa’e de’it orasaun ba Na’i Maromak atu tulun nafatin Avo Nana ho nia oan sira kontinua hala’o atividade ajuda povu Timor-Leste.
Nia dehan, bainhira eskola ne’e harii Mana Kirsty Sword Gusmão mak fó apoiu to’o agora Avo Nana kontinua fó nafatin apoiu ba sira.
“Ulu kami loke Mana Kisrty no Madre Lucia mak mai harii eskola ne’e to’o agora, Avo Nana ho nia oina mai nafatin tan,” nia agradese.
Husi liman karuk, Kay Olo Gusmão (alin), no liman loos Alexandre Gusmao (maun) mak ida taka sapeo ne'e./Net.
Komunidade Kongregasaun Imitasaun de Jesus lokaliza iha Aldeia Rai Fusa, Suku Betano, Munisipiu Manufahi dadaun ne’e halibur labarik hamutuk 68 kompostu feto 23 no mane 45 ne’ebé hala’o estudu iha ensinu sekundaria.
Estudante sira ne’ebé hela iha madre sira nia fatin mai husi munisipiu hotu durante ne’e hetan asistensia hodi madre na’in lima mak tau matan hodi eduka sira iha siensia oin-oin no hala’o no aprende atividade relizioju no seluk tan.
Apoiu ne’ebé Xanana ho nia oan no espoza Kirsty Sword Gusmão oferese la’òs foin agora, maibé durante ne’e oferese apoiu oin-oin ba grupu orfonatu balun inklui harii eskola iha munisipiu balun.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
