TAROMAN (TOP) – Hanoin ba mandatu governu atu remata dadauk ona, membru governu sira mós oras ne’e aproveita sira nia mandatu hala’o programa governu nian ho modelu kampaña politika atu nune’e bele hetan konfiasan husi povu iha festa demokrasia ka eleisaun parlamentar ne’ebé sei akontese iha loron Domingu, 21 Maiu 2023.
Ijemplu husi kestaun ne’e mak bele hare husi lala’ok Sekretadu Estadu ba Kooperativa (SEKOOP), Elizario Fereira aproveira ninia privelio ne’e la’os de’it atu haburas no haluan serbisu kooperativa iha rai-laran, maibé mós hala’o konsolidasaun partidu politika FRETILIN iha kada munisipiu sira.
La’os de’it membru governu sira hanesan Elizaroi Fereira, maibé inklui mós Administrador Munisipiu sira balun ne’ebé tuir loloos tenke halo esforsu oinsa atu bele administra ka jere ninia munisipiu ne’e la’o ho di’ak, maibé aproveita hotu kargu ne’e hodi halo konsolidasaun partidu FRETILIN.
Ijemplu ida mak, Administrador Munisípiu Kovalima Francisco de Andrade hafoin akompaña Sekretaria Estadu Kooperativa (SEKOOP), Elizario Ferreira hodi hala’o atividade governu nian fo formasaun ba grupu kooperativa Haburas Unidade Naroman (HABUNA) iha Aldeia Fatu Loro, Suku Taroman, Postu Administrativu Fatululik ho modelu kampaña.
Iha intervensaun Administrador Munisipiu Kovalima Francisco de Andrade dehan eleisaun parlamentar besik ona, povu labele monu ba manobra lideransa politiku sira nian hodi buka votu no lakohi lider politiku sira hemu tua povu mak lanu fali.
"Iha biban ida ne’e nudar autoridade atu hato’o ba ita boot sira iha fatin ida ne’e katak ita nia prezidente republika dekreta ona loron eleisaun parlamentar nian, maibé dala ruma iha foho ne’e ema lideransa politiku na'in sira hemu tua iha ne’eba lanu iha ne'e mai, ida ne'e hanesan autoridade lakohi atu akontese iha Kovalima atu povu monu ba iha manobra lider politiku sira nian," informa Administrador Munisípiu Kovalima Francisco de Andrade, hafoin akompana Sekretaria Estadu Kooperativa (SEKOOP) halo dialogu ho komunidade sira iha Aldeia Fatu-Loro, Suku Taroman, Postu Administrativu Fatululik, Kinta 17 Fevereiru 2023.
Adiministrador haktuir, dala ruma lider partidu politiku balu atu hetan votu sira la’o tama sai aldeia no suku sira hodi sosa votu ho osan $ 50- $ 100, ida ne’e akontese beibeik, tan ne'e nudar autoridade hakarak hato'o ba ita boot sira kuandu eleisaun to'o ona ba iha sentru votasaun tenki vota ho konsiensia labele vota tanba ema nia osan.
Tanba nia fó osan U$ 50 ohin signifika nia sosa votu, bainhira nia manan ona hodi ba ka’er ona nia sei la tau matan ba o, tanba o nia votu ne’e la’os gratuita maibé nia sosa ho U$ 50.
Kuandu sira sosa ona, sira ba ukun nunka tau matan ba povu tanba sira sosa imi nia votu, ne'ebé bainhira sira ba kaer ukun karik sira hanoin ona durante hasai osan hodi ba sosa votu ne’e bainhira mak tama fali, entaun sira aprova osan estadu nian ne’e tenki foti beibeik hodi rekopera nia orsamentu, maibé antes atu rekopera hotu nia mandatu mós hotu entaun dezenvolvimentu mós sei la la’o.
Administrador dehan foin lalais FRETILIN halo viabilizasaun ba VIII governu no planu governu ida ne'e nian mak hari uma kbi'it la’ek (UKL) ne'ebé nakfilak ona ba Uma Naroman ba Povu (UNP), la hanesan sira ne'ebé kaer governu uluk hari uma MDG’s halo animal mak hela ba la’os ema mak hela ba.
“Imi simu ona uma UKL ka seidauk, imi simu sesta bázika ka seidauk, imi simu osan subsidiu U$ 200, ka seidauk, imi simu ona, serbisu mão de obra ne’e imi serbisu ka la’e komunidade sira hatan dehan ami simu no serbisu, planu ida ne'e la’o hafoin FRETILIN ba vializa mak foin implementa programa sira ne’e, katak dezenvolvimentu hakbesik ba komunidade labele dezenvolvimentu konsentra fali iha nasionál ne’eba,” administrador Kovalima ne’e haluhan aan tiha estrada ne’ebé kaber lubuk ida ne’ebé halo ona husi governu anterior.
"Kuandu buat sira ne’e atu la’o didi’ak no la’o susesu ba oin imi hotu hotu bainhira iha eleisaun parlamentar ne'e mai karik ha’u hanesan autoridade husu nafatin imi atu vota ba oitavu governu konstituisional ida ne'e, atu nune’e programa sira ne’e bele la’o kontinua hodu hadi'a povu nia moris," Francisco de Andrade abuzu nia poder nu’udar administrador hodi ameasa fali komunidade sira iha Suku Taroman atu tenke vota ba FRETILIN iha eleisaun parlamentar tuir mai.
Administrador haktuir “hanesan foin lalais akontese iha media sosial kuandu governu ida ne'e halo uma ba povu kbi'it laek sira ba hasa’e fali bandeira CNRT, uluk CNRT halo mak uma MDGs’ iha Tilomar ne’eba, povu ki’ik sira seidauk hetan uma maibé sira halo uma ba animal hanesan karau, bibi, fahi no manu sira mak hela ba, tanba ne’e mak dala ida tan nudar autoridade lakohi nia povu sai vitima tan ba ema seluk, maibé imi tenke matan moris neon na'in eleisaun parlamentar besik ona vota ba oitavu governu konstituisional atu nune'e dezenvolvimentu lao hanesan ne’e nafatin”.
Sekretaria Estadu Kooperativa (SEKOOP), Elizario Ferreira tuir loloos tenke esplika kona-ba planu governu nian oinsa bele haburas liu-tan lala’ok serbisu kooperativa iha iha rai-laran, maibé ba konta fali lala’ok partidu FRETILIN nian ne’ebé sai “ai-tonka” iha governasaun atual.
Kamarada Elizario Fereira haktuir katak, planu oitavu governu konstituisional nian mak halo uma kbi'it laek ba povu atu hela ba la’os hanesan sira ida uluk kaer governu halo uma MDGs tesik ba iha Tilomar ne’e mós gasta osan hanesan UKL nian, maibé agora uma sira ne’e se mak hela ba, kolega sira animal ain hat (4) kuda, karau, fahi, bibi sira mak hela ba la’os ema mak hela.
Elizario dehan sira halo buat ida laiha responsabilidade depois dehan ne’e sira ni’an, maibé governu agora ne’e halo buat ida ho kualidade hodi fó ba povu hela.
FRETILIN ba viabiliza oitavu governu konstituisional hatudu duni ninia maturidade politika ho prinsipiu ida katak liberta patria, liberta povu, programa ida tuir mak uluk katuas ho ferik tinan tinan boot simu osan U$ 30 agora sa’e ona ba U$ 50 kada fulan ne’e planu governu ida ne'e nian hodi aumenta subsidiu idozos ne’e, planu ida agora inan isin rua sira sei simu fula-fulan $ 15.00 ne’e ema bolu dehan jerasaun foun, ne'ebé aprova kedas iha tinan 2022, husi ida ne’e ba oin labarik moris mai sei simu nafatin osan ne’e to'o tinan 6 programa ne'ebé mak aprova ona, la’os bosok.
Faktudu hatudu, governu atual ne’ebé viabiliza husi partidu FRETILIN nunka aprezenta programa governu nian ba Parlamentu Nasionál to’o ohin loron, no seidauk mós hato’o kontas públiku kona-ba lala’ok ezekusaun fundu Covid-19, no projetu sesta bázika ba povu to’o ohin loron.
Elizario afirma uma naroman ba povu FRETILIN kompremete iha tinan 2018, katak FRETILIN manan ba ukun sei halo uma, agora FRETILIN la manan mais ba viabiliza de’it nia bele halo ona uma ida ne’e, maibé faktu hatudu povu la fó konfiansa ba partidu FRETILIN iha eleisaun 2018. (JS)
