RIATU (TOP) – Komunidade sira iha aldeia Riatu, suku Daisua, postu administrativu Same, munisipiu Manufahi sente triste no pániku tebes ho kazu deskonfia la’en oho tiha fen-kaben hafoin hafuhu malu durante tempu balun nia laran.
Tuir informasaun balun ne’ebé The Oe-Kusi Post (TOP) asesu husi reportajen Diariu ARS iha edisaun 15 Fevereiru 2023 katak, deskonfia autor ho naran inisial CB nu’udar la’en-kaben oho tiha nia fen-kaben Rosalina da Costa (30) iha loron Tersa, 14 Fevereiru 2023 iha aldeia Riatu, suku Daisua, postu Same, munisipiu Manufahi.
Alicia Clara nu’udar oan feto ida husi matebian Rosalina da Costa konta, molok akontese oho malu, durante ne’e nia aman ho naran inisial CB sempre hafuhu tutuir nia inan Rozalina Costa.
"Baibain ha'u nia aman sempre hafuhu ama bainhira sai ba fatin ruma, ne'e mak ohin meudia ama sai ba to'os, apa mós tuir kedas ba," katak Alicia Clara ne’ebé TOP asesu iha reportajen Diariu ARS edisaun Kuarta, 15 Fevereiru 2023.
Alicia hatutan, hafoin liu oras balun, nia aman CB mós fila ba uma ho isin molik (la hatais faru ida), hatais de’it nia kalsa ida ne’ebé fo’er hela.
“Ha’u nia aman tuir tiha ba to'os fila mai ho isin moos la tau faru ona, no nia tama uma-laran hodi troka tiha nia kalsa ne'ebé fo’er, no ho katana halai sai tiha," Alicia Clara konta.
Maibé, molok CB tama troka, Alicia konta katak, nia aman sei husu tan nia nu’udar oan-feto boot hodi ba buka nia alin nain-5 sira seluk atu sai ba buka sira nia inan ne’ebé deskonfia sira nia aman CB oho mate tiha ona.
https://www.youtube.com/shorts/S75tmBJi0lM
“Ha’u nia aman tama mai, dehan ba ha’u o mak oan-feto boot halibur o nia alin na'in-5 hodi bá buka imi nia inan. Nia sei dehan tan, buat ne'ebé lor-loron dehan mak ne'e, ne'e pas. Rona tiha ida ne'e ha'u ho alin ikun bá buka ama la hetan ida,” Alicia konta.
Alicia hatutan, nia aman husi suku Babulo, inan matebian husi aldeia Riatu, suku Diasua. Matebian mate husik hela oan nain 6 kompostu husi mane 3 no feto 3.
Iha parte seluk, Komandante Polisia Munisipiu Manufahi, Superintende, Joni Viana das Regras hatete, akontese duni kazu ne’e iha aldeia Riatu, suku Daisua ne’ebé deskonfia la’en mak oho tiha nia fen-kaben.
"Bainhira PNTL simu informasaun husi fontes kredivel, orienta kedas komandante esquadra Same, xefe investigasaun ho ekipa sira, forsa rezerva intervensaun rapida to'o iha lokal krime (fatin akontesimentu) hodi halibur kedas mate-isin no transporta mai hospital Same hodi kontinua ba Hospital Nasionál Guidu Valedares (HNGV) hodi halo prosesu autopsia," esplika komandante Joni Viana.
"Molok ba prosesu autopsia, horikalan ha'u halo ona komunikasaun ho prokurador distrital Suai atu bele hetan orientasaun oinsá prosesu kazu refere," nia esplika.
Komandante Jony Viana katak, suspeitu sei iha hela area jurisdisaun akontesementu no komandu PNTL lansa ona ekipa buka tuir tanba ida ne'e konsidera situasaun flagrante de leitu.
"Ohin ita sei esforsu maka'as hodi buka tuir suspeitu atu nune'e nia bele koopera ho Justisa," nia promete.
