OELEO (TOP) – Komandante em Chefe das FALINTIL, Kay Rala Xanana Gusmão deklara durante lidera luta no terus hamutuk ho povu iha ai-laran la’ós atu buka kargu sai jeneral hodi halo previlejiu ba nia aan rasik, maibé luta atu liberta povu no rai ne’e husi okupasaun kolonial.
Xanana konsidera ema balun ne’ebé hanoin luta hakarak sai jeneral, ne’e hanoin de’it ba nia interese pesoál, maibé nunka fiar aan atu tau aas fiar husi povu hodi hadia dezenvolvimentu nasaun no liberta povu husi kiak no mukit.
“Ha’u la’ós luta halo ba funu atu sai jenerál, ha’u halo funu atu liberta rai ida ne’e.
Hakarak sai jeneral, iha ukun aan, ha’u mak jenerál primeiru. Iha Aileu serimónia boot ida ho FALINTIL, UNTAET, Forsa ba Dame no UNPOL, ha’u hakotu nia misaun sai husi soldadu FALINTIL, tanba ita la’ós buka poder ba ita nia aan, tanba povu mak eroi, povu ida ne’e mak terus. Se povu la apoiu ó, ó atu sai lider to ne’ebé, ó la halo!, ó sai lider tanba lider povu mak hili, povu mak dehan ó halo ba. Ha’u lori FALINTIL barak moras too mate, ha’u ba too Ostico-Bauacau. Povu dehan ba ami, imi labele rende, imi bele mate too mohu, ita tenki ukun aan, ne’e katak, povu mós partisipa iha luta,” nia fó lembra.
Iha funu naruk ne’e, Xanana dehan nia la’o ain heleu Timor tomak kuaze tinan ida resin hodi hamoris hikas luta ba libertasaun nasionál.
“Iha Bobonaro, ha’u la’o to’o iha ne’e, haree povu mate hamlaha, ha’u ho soldadu kuaze na’in 15 iha foho Lour -Bobonaro besik mota kuaze semana ida ami foti povu nia ai-farina iha to’os laran, ida ne’e hatudu katak, povu nia partisipasaun iha luta mak ida ne’e,” Xanana fó lembra.
“Imi fó votus la’ós atu ha’u sai primeiru ministru, maibé ha’u ba atu hadia rai ida ne’e, tanba ne’e ha’u husu imi ba vota CNRT para atu hadia povu nia moris, no vota para hadia buat aat sira hotu ne’ebé sira halo abiru, hanoin ida ne’e mak foin ba vota,” nia dezafia.
Xanana dehan, iha funu 1975 nia hamutuk ho jornalista Austráliano halo vizita ba Postu Bobonaro halo kobertura haree ema barak hetan oho, tanba de’it hakarak ukun aan.
Molok halo konsolidasaun, Xanana hato’o minutu silensiu hodi presta omenajen ba saudoza Maria Tapo nu’udar eroina nasionál husi munisipiu Bobonaro ne’ebé brani foti kilat tiru hasoru inimigu sira iha Tapo, Bobonaro.
Konsolidasaun ne’e partisipa direita husi autoridade no povu suku 18, Malialait, Bobonaro, Oeleo, Tapo, Sibuni, Leber, Aiasa, Sibuni, Molop, Lour, Carabau, Lourba, Kotaboot, Tebabui, Mali-Ubu, Ilatlaun, Atu-Aben no Soilesu.
