OELEO (TOP) – Militante lubuk ida husi partidu FRETILIN iha munisipiu Bobonaro oras ne'e lakohi ona atu kontinua kumu-liman 'mamuk' ba partidu FRETILIN, tanba tuir sira katak, durante ne'e laiha mudansa signifikativu ba prosesu dezenvolvimentu iha rai-laran. Nune'e, sira desidi ba hamutuk fali ho partidu CNRT iha eleisaun parlamentar ne’ebé sei akontese iha tempu badak.
Kamarada FRETILIN sira husi suku 18 ne’ebé partense ba postu-administrativu Bobonaro durante tinan barak kumu sira nia liman metin ho partidu FRETILIN ne’ebé lidera husi Francisco Guterres Lú Olo no Sekretariu Jeral FRETILIN, Mari Bim Amude Alkatiri, maibé tanba lahetan mudansa ruma durante ne’e mak sira hotu desidi ona hodi hamutuk fali ho CNRT atu bele lori povu no nasaun ne’e ba oin.
Portavos afiliante Suku Malibu, Bendito dos Santos deklara hafoin halo analiza klean ba situasaun politika iha rai-laran, sira nota katak, uniku Xanana mak bele ukun hodi hadia fali nasaun no povu nia moris. Tanba governu atuál ne’ebé lidera husi Primeiru-Ministru, Taur Matan Ruak no tonka husi FRETILIN tinan lima ona la halo buat ida.
“Durante tinan lima nia laran, ami la hetan dalan ba naroman, tanba ami haree povu ne’e terus, ami haree so Avó Nana (Xanana) mak tun ajuda povu no bele hadia povu nia moris, tanba ami terus liu ona durante hamutuk ho FRETILIN, tanba ne’e ami mai hamutuk ho Avó Nana atu dada ami ba naroman,” hateten Bendito dos Santos ho nia kamarada FRETILIN lubuk ida husi suku 18 iha postu Bobonaro bainhira desidi avilia ba CNRT iha suku Oeleo, munisipiu Bobonaro, Sesta 20 Janeiru 2023.
Iha oportunidade ne’e, Prezidente Partidu CNRT, Kay Rala Xanana Gusmão hamutuk ho nia Sekretariu Jerál CNRT, Dato Sri Francisco Kalbuadi Lay simu afiliasaun militante partidu FRETILIN ho laran kontente.
Hafoin simu tiha militante afiliasaun hirak ne’e, Xanana hato’o parabéns ba desizaun ne’ebé sira foti ho konsensia sai husi FRETILIN hamutuk ho nia ho objetivu ida kontinua luta atu liberta povu no nasaun hodi hakat ba dezenvolvimentu.
“Ohin maluk sira husi FRETILIN, hakuak imi hotu, ita hotu hamutuk, ita la’o. Inimigu tama tiha ona mai okupa tiha Maliana, ha’u membru Committee Central FRETILIN (CCF) tiha ona, ha’u mai tiha ne’e ba to’o fatin ida naran Hali-Mesak,” Xanana esplika.
Xanana konta, iha tempu ne’eba nia sei nu’udar jornalista hela ba Hali-Mesak, Bobonaro akompaña husi jornalista Australianu ida hodi halo kobertura kona-ba invazaun militar Indonézia mai Timor-Leste iha Dezembru 1975.
“Imi sai husi FRETILIN, tanba imi deside atu hadia rai ida ne’e, la’ós tanba ha’u, mai ba ita hamutuk hadia ita nia rain. Ita hanoin atu dezenvolve povu no rai ida ne’e nia moris, ita hotu tenki esforsu aan manan absoluta,” nia afirma.
Eis Prezidente Repúblika ne’e hatutan, bainhira ka’er ukun, nia parte sei reve lei barak no hadia prosesu dezenvolvimentu nasaun.
“Bainhira ita ka’er ukun, sei hadia governu, kaer Parlamentu sei hadia programa barak, tanba partidu ne’ebé loos, partidu ne’ebé bele hatudu nia vizaun hodi kaer poder nia kumpri nia misaun,” tenik nia.
Nia hatutan, CNRT iha prinsipiu politiku, tanba kaer ukun atu servi, tanba kaer ukun la’ós atu hatama de’it ema servisu, maibé tenki iha prinsipiu atu hadia povu no dezenvolve ekonomia no hadia povu nia bem estar.
Koordenador CNRT Postu Bobonaro Tomas Marques deklara povu Bobonaro suku 18 sei manan absoluta ba eleisaun parlamentar mai, tanba iha eleisaun prezidensiál hetan votu rihun 23, no suku 18 iha Postu Bobonaro uniku suku 17 vota maioria ba PR Horta.
