FATUMEA (TOP) – Konseleiru partidu CNRT munisipiu Kovalima, Rui Lopes hamutuk ho povu sira iha Kovalima kompromete sei halo serbisu maka’as liutan hodi lori vitoria ba partidu CNRT atu nune’e bele ka’er ukun iha tinan 2023 ba oin.
Antes ne’e Diretor Sekretariadu Tekniku ba Administrasaun Eleitoral (STAE) munisipiu Kovalima, Francisco Gusmão katak, eleitor sira husi munisipiu Kovalima ne’ebé partisipa iha eleisaun prezidensial ronde dahuluk iha loron 19 Marsu 2022 hamutuk ema nain 37.534 ho nia sentru votasaun hamutuk 80, no estasaun votasaun hamutuk 92 ne’ebé involve brigadista hamutuk nain 80, no ofisial CNE hamutuk nain 103.
Husi total partisipante eleitor ne’e rezulta kandidatu Prezidente Repúblika husi partidu CNRT nian, José Manuel Ramos-Horta hetan votu válidu hamutuk 17,965 (48,72%), no kandidatu husi partidu FRETILIN, Francisco Guterres Lú Olo hetan de’it 6563 (17,80%).
Ba fali eleisaun prezidensial ronde daruak mós José Manuel Ramos-Horta kontinua manan nafatin iha postu Fatumea, munisipiu Kovalima no iha teritoriu nasionál hodi ikus mai sai duni prezidente ba povu tomak desde loron 20 Maiu 2022.
Ho rezultadu ne’e, Konseleiru partidu CNRT munisipiu Kovalima, Rui Lopes kontinua husu ba povu sira iha Kovalima liliu iha postu administrativu Fatumea atu kontinua hamrik metin nafatin hodi kontinua vota ba partidu CNRT atu nune’e bele lori tan Komandante em Xefe das FALINTIL, Kay Rala Xanana Gusmão ba Primeiru-Ministru iha tinan 2023 ba oin.
“Tenke ho laran no neon, ha’u dale ba imi para imi atu moris di’ak fila ba CNRT. Se imi vota ba CNRT iha 1999, entaun tenke tuir CNRT nafatin. CNRT mak dalan ida di’ak liu ba ita, tanba CNRT iha planu para tinan 5 sa mak atu serbisu la’os hanesan governu ida ne’e mehi tiha mak foin dehan aban halo ida ne’e, halo ida ne’eba,” Rui Lopes katak ba militante no simpatizante partidu CNRT nian iha postu Fatumea, munisipiu Kovalima, Domingu 14 Agustu 2022.
Rui Lopes rekoñese aan nia mós ema bosok ten ida, maibé governasaun atual bosok ten liu nia. Tanba ne’e nia husu ba militante no simpatizante CNRT nian tomak iha munisipiu Kovalima atu lalika fasil fiar lia-bosok sira husi ema seluk.
“Hanoin CNRT, hanoin Xanana. Xanana iha mehi di’ak ida, iha hanoin di’ak ida ba nasaun no povu ida ne’e, tanba ne’e ita tenke hamutuk dala ida tan hodi lori nia ba Primeiru-Ministru iha tinan oin,” Rui Lopes hateten.
Iha fatin hanesan, koordenador partidu CNRT postu administrativu Fatumea hateten, eleisaun prezidensial ronde dahuluk, kandidatu José Manuel Ramos-Horta hetan votu válidu hamutuk 687, no eleisaun ronde daruak nian hetan 1120.
“Ha’u hare dadus husi tinan 2017 to’o ohin loron, CNRT sei la fó biban ba ita nia maluk sira seluk,” nia hateten.
Entretantu, Sekretariu Jeral Partidu CNRT, Francisco Kalbuadi Lay hateten, nia prezensa iha postu Fatumea atu hato’o agradesimentu ba votante hotu tantu mai husi partidu CNRT rasik ho partidu aliadu sira seluk ne’ebé konsege depozita ona sira nia konfiansa tomak ba José Manuel Ramos-Horta iha eleisaun prezidensial ronde dahuluk no daruak.
“Ohin ha’u mai iha ne’e hodi hato’o mensajen importante ida husi Maun Boot Kay Rala Xanana Gusmão nian kona-ba agradesimentu ba ita boot sira ne’ebé serbisu maka’as tebes hodi konsege lori Ramos-Horta ba hetan vitoria iha eleisaun prezidensial,” esplika Kalbuadi Lay.
Hafoin seremonia agradesimentu, Sekretariu Jeral Partidu CNRT ne’e mós kontinua kedas ho atividade konsolidasaun partidu CNRT nian iha postu Fatumea hodi kontinua husu nafatin ba estrutura CNRT nian iha baze atu halo serbisu maka’as liutan hodi hasoru eleisaun parlamentar iha tinan oin.
