LAKLÓ (TOP) – Sarani sira ne’ebé partense ba Parokia São Vicente Ferrer Lakló hamutuk nain 700 simu ona sakramentu konfirmasaun (krizma).
Seremónia ne’e lidera husi Administrador Diocesano Baucau, Pe. Alípio Pinto Gusmão no akompaña husi Padre Paroko Igreja São Vicente Ferrer Lakló, Abilio Da Costa, iha loron Domingu 24 Jullu 2022.
Administrador Diocesano Baucau ne’e esplika, sakramentu krizma (konfirmasaun) nu’udar sakramentu inisiasaun iha igreja katolika.
Sakramentu Konfirmasaun hanesan mós sinál ida atu hametin no halo kompletu sakramentu Batizmu, liuliu iha fiar sarani nian. Batizmu hatudu ba moris foun. Konfirmasaun hatudu ba ema ne’e iha ona idade adulta. Batizmu hatudu ba ita-nia moris, no Konfirmasaun halo ita sai forte hodi luta ba moris ka ba fiar nune’e mós Konfirmasaun halo ita atu simu grasa barak.
Sakramentu sira Kristu rasik mak halo no fó mai Igreja hanesan sinál kmanek atu hetan grasa no moris rohan la’ek. Tan ne’e, moris sakramentál fó fuan ba ema ida- idak (individualmente) no mós ba Igreja. Ba ema fiar nain katak nia moris ba Maromak hamutuk ho Jesus Kristu, no ba Igreja, katak Igreja iha domin no simu kna’ar atu sai testemuña.
“Depois simu tiha sakramentu krizma ne’e tenke brani no labele moe hodi fó sasin liu husi fiar. Sarani barak mak atu de’it sinál mós sempre moe hela de’it. Ida ne’e labele akontese hanesan ne’e, ita tenke fó sasin ba Maromak. Labele moe fó sasin ba Maromak iha ita nia moris lorloron,” Administrador Diocesano Baucau, Pe. Alípio Pinto Gusmão husu ba krizmante sira liu husi nia omilia iha Parokia São Vicente Ferrer Lakló, Manatuto, Domingu 24 Jullu 2022.
Iha audiénsia jerál ida iha tinan hirak liuba, Papa Francisco konsentra nia hanorin iha Sakramentu Krizma; hodi fó kontinuidade ba siklu katekeze kona-ba sakramentu sira, Santu Padre destaka importánsia konfirmasaun nian, ne’ebé hamutuk ho Batizmu no Eukaristia, forma inisiasaun sarani.
St. Agustinho nia hanoin kona-ba sakramentu: “Sacramento como sinal vizível da realidade invizível.”
Sakramentu sira mak “obra Maromak nian” iha Testamuntu foun no moris rohan la’ek (Catecismo da Igreja Católica-CIC art. 1116). Iha Igreja iha de’it sakramentu hitu, laliu no la kuran.
Sakramentu sira iha igreja katolika ho nia sinál sira;
1. Sakramentu Batizmu, hanesan odamatan atu tama ba moris foun.
2. Sakramentu Konfirmasaun ka Krizma,sinál ba moris espirituál be adultu.
3. Sakramentu Eukarístia, sinál ai-han espirituál ba klamar.
4. Sakramentu Konfesa, sinál atu kura klamar (espirituál).
5. Sakramentu Unsaun ba ema moras, sinál atu kura isin no klamar ba loron ikus.
6. Sakramentu Orden, sinál kontinuasaun atu governa moris espirituál iha Igreja.
7. Sakramentu Kaben, sinál uniaun entre Kristu ho Igreja.
