MANATUTO (TOP) – Oras ne’e dadauk partidu politiku sira tantu sira ne’ebé hetan asentu no lahetan iha Parlamentu Nasionál hahu ona sira nia atividade konsolidasaun partidaria iha baze nu’udar preparasaun ida ba eleisaun parlamentar ne’ebé sei akontese iha tinan oin, 2023.
Husi partidu CNRT rasik halo ona ninia abertura konsolidasaun iha Dili iha fulan Juñu liuba, no oras ne’e dadauk Prezidente partidu CNRT Kay Rala Xanana Gusmão fó hela kompetensia no konfiansa tomak ba iha nia Sekretariu Jeral CNRT, Francisco Kalbuadi Lay hodi hala’o atividade agradesimentu ba militante sira iha teritóriu nasionál ne’ebé depozita ona sira nia konfiansa durante eleisaun prezidensial dahuluk no daruak nian.
Koordenador CNRT munisipiu Manatuto Nai Marcos husu ba nia estrutura sira iha baze atu labele dukur hodi kontinua halo serbisu maka’as liutan hodi bele lori Komandante em Xefe das FALINTL, Kay Rala Xanana Gusmão tenke ba manan iha eleisaun parlamentar tuir mai hodi bele assume kargu nu’udar Primeiru-Ministru.
“Ita ema ne’e hanesan de’it, maibé karater lideransa mak la hanesan. Maun Xanana mak halo mudansa maka’as ba ita nia luta hodi ita konsege hetan ita nia independensia. Nia mak lidera ita ba funu durante tempu rezistensia,” esplika Nai Marcos hodi husu ba militante no simpatizante partidu CNRT nian iha Manatuto atu hahu ohin ba oin tenke tun ba baze ona hodi halo konsolidasaun ba partidu ne’e.
Nia hatutan, durante tempu rezistensia nia ladun hasoru malu ho Komandante em Xefe das FALINTIL Kay Rala Xanana Gusmão, maibé povu sira iha Manatuto hatene katak, nia mós kontribui ai-han ba Xanana iha tempu ikus liu nian ona.
“Depois nia sai husi prijaun mak ha’u foin hasoru nia, maibé hakarak hatete ba ita boot sira katak, tenke aproveita didi’ak maun Xanana, tanba ne’e oportunidade ikus ona ba nia hodi lori ba nia ba Primeiru-Ministru, maibé depende ba ita hakarak vota ba nia ka la’e? Se ita hakarak nia tenke ba Primeiru-Ministru, entaun tenke ita tenke vota ba nia iha eleisaun parlamentar ne’e,” esplika Nai Marcos.
Sekretariu Jeral partidu CNRT, Francisco Kalbuadi Lay.
Iha fatin hanesan Sekretariu Jeral partidu CNRT, Francisco Kalbuadi Lay hateten, nia prezensa iha Manatuto ne’e atu hato’o agradesimentu ba ema hotu ne’ebé fó ona sira nia votu ba José Manuel Ramos-Horta ne’ebé desde loron 20 Maiu 2022 sai ona Prezidente Repúblika ba povu tomak, la’os ba povu sira iha partidu CNRT de’it.
“Ha’u mai atu hato’o de’it agradesimentu no obrigadu barak ba ita boot sira inklui fiskais sira ne’ebé serbisu maka’as tebes durante eleisaun prezidensial dahuluk no daruak nian, no hahu ohin ba oin ita konsolida aan nafatin hodi hasoru eleisaun parlamentar iha tinan oin,” hateten Kalbuadi.
Kalbuadi hatutan, partidu CNRT oras ne’e prontu kualker tempu hodi hasoru eleisaun parlamentar, no fiar metin katak partidu ne’ebé lidera husi Komandante em Xefe das FALINTIL Kay Rala Xanana Gusmão sei kontinua hetan konfiansa maka’as iha eleisaun parlamentar.
“Ita tenke fiar a’an la’o bao in, no mai dala ida tan ita kontinua halo serbisu maka’as hodi hasoru eleisaun parlamentar ne’ebé sei akontese iha tinan oin,” hateten Kalbuadi.
Agradesimentu no konsolidasaun hanesan ne’e mós akontese iha postu administrativu Vemase, munisipiu Baukau.
Koordenador partidu CNRT postu administrativu Vemasse, Moises Amancio Boavida hateten, postu Vemsa iha suku 7, aldeia hamutuk 22. Husi suku 7 ne’e, desde eleisaun 2007 to’o ohin loron partidu CNRT mak sempre manan maioria iha suku Caicua.
Konsolidasaun CNRT iha suku Caicua, postu administrativu Vemasse, Domingu 10 Jullu 2022.
Nia hatutan, total votu ne’ebé suku ne’e hetan iha eleisaun prezidensial ronde dahuluk nian mak 1512, no eleisaun prezidensial ronde daruak nian sa’e ba 2523.
“Tanba ne’e hakarak agradese ba votante sira hotu iha postu Vemasse liliu iha suku Caicua ne’e,” hateten Moises.
Nia dehan, sei kontinua halo serbisu maka’as iha baze hodi hametin no haboot liutan partidu CNRT ne’e iha postu Vemasse hodi hasoru eleisaun parlamentar nian.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
