DILI (TOP) — Reuniaun Konslelu Ministru (KM) ba dahuluk aprova ona programa governu dasia nian.
Molok halo aprovasaun, membru governu sira halo diskusaun ba programa hirak ne’e hahu iha loron Tersa semana kotuk to’o remata iha loron Segunda semana ne’e, no ikus mai aprovadu tiha ona iha reuniaun Konsellu Ministru sira ne’ebé hala’o iha Palásiu Governu iha loron Kuarta 12 Jullu 2023.
“Konsellu Ministru aprova ona programa governu konstitusionál IX. Programa ne’e sintetiza polítika públika prinsipál sira ne’ebé atu adota durante governu ninia mandatu,” hateten Ministru Presidensia Konsellu Ministru, Hermenegildo António Calbral Pereira ba jornalista sira iha Palásiu Governu, Dili, Kuarta 12 Jullu 2023.
Ministru Agio hatutan, programa ne’e nia objetivu mak atu hametin no otimiza setór governasaun nian no sira nia rekursu, hodi habadak dalan atu transforma vizaun ajenda Dezenvolvimentu Sustentavel 2030 nian no Planu Estratéjiku Dezenvolvimentu 2011 - 2030 hodi sai realidade.
Nia dehan, Konsellu Ministru delibera mós aprezenta ba Parlamentu Nasionál votu konfiansa ida ba governu, ne’ebé fundamenta husi kompromisu ne’ebé firme no determinadu governu atu implementa ninia programa, ho objetivu atu promove dezenvolvimentu, prosperidade no moris di’ak ba sidadaun hotu.
Programa ne’e kompoin husi área prinsipál neen (6), mak hanesan afirma fila-fali Estadu Direitu Demokrátiku, dezenvolvimentu kapitál sosiál, dezenvolvimentu infraestrutura, dezenvolvimentu ekonomia, konsolidasaun governativa no governasaun di’ak, no kombate hasoru korrupsaun.
Antes ne’e, Primeiru-Ministru, Kay Rala Xanana Gusmão promete durante nia tomada posse iha loron 01 Jullu liuba katak, durante loron 120 nia laran, ninia governu sei halo;
- Repoen normalidade demokratika, liu husi Parlamentu legitimu ida, nebé hahu ona ninia VI Legislatura, no husi Governu legal, atu aprova Programa do Governu nian ba tinan 5, aprova Orsamentu Retificativo ba 2023 no aprova Orsamentu jeral do Estadu tinan 2024.
- Revoga Lei no. 3/2014, nebé kria RAEOA no ZEESM atu subordina fali Autoridade RAEOA nian ba kontrola ida nebé di’ak liu husi Govenu sentral.
- Anula tiha Lei nebé kria munisipiu de Atauru tanba falta de kondisoens infraestruturas nian no logisticas, nebé la iha liu, iha illa de Atauro, hanesan estradas, eletrisidade, bé, portu no aeroportu.
- Hala’o Auditorias ba Tribunal de kontas, ba komisaun Anti korrupsaun no ba Ministériu Publiku kona-ba irregularidades barabarak iha Relatoriu Anuais, kona-ba programa oi-oin no konaba falta de prosesu tenderizasaun ba projetu barak tebes.
- Hala’o Auditoria ba komisaun da Funsaun Publika no ba Inspesaun jeral do Estadu, kona-ba rekrutamentu ne’ebé ilegais no hapara kontratu sem justifikasaun.
- Hala’o Auditoria ba fraude eleitoral, ne’ebé Administrasaun Eleitoral komete, iha Eleisaun Parlamentares foin daudauk ne'e.
- Re-estrutura ho lalais, Diresaun TIMOR GAP no ANPM nian, atu bele garante efisiensia iha setor do petroleu, ne’ebé krusial ba desenvolvimentu pais nian.
- Re-estrutura Polisia sientifika de Investigasaun kriminal (PCIC), tanba la hatudu liu integridade no profissionalismu.
- Konsolida paz no seguransa, nesesaria ba dezenvolvimentu nasional, hodi garante direitu liberdades no garantia fundamentais ba sidadaun hotu-hotu.
- Haree fali ho lalais prosesu ilegal ba aposentasaun forsada, ne’ebé afeta agentes PNTL barak tebes.
- Reforma no re-estrutura, lalais kedas, Servisu Nasional de Inteligénsia, atu bele garante més integridade no proffisionalismu.
- Alerta ba Agentes hotu-hotu PNTL, nebé ba jura atu serbi partidu ida, atu sira renunsia tiha ba lasus de juramento nee ou entaun sai husi PNTL.
- Halo auditoria no reve fali, karik presiza duni, “negosiu” boot sira nebé Governu halo iha ona.
