DILI (TOP) — Deputadu sira husi bankada CNRT iha Parlamentu Nasionál (PN) kontinua hato’o ezijensia ba governu dasia ne’e hodi loke prosesu investigasaun ba programa estajiu profisional ne’ebé nakfilak ba programa politizasaun partidu FRETILIN nian iha Rejiaun Administrativu Espesial Oe-Kusi Ambeno (RAEOA) ho naran “Ami Prontu ba Serbisu” (APS).
Deputadu CNRT, Natalino Dos Santos hateten, tuir informasaun ne’ebé nia asesu, programa APS ne’e mak programa estajiu profisional katak, bainhira foin sa’e sira ne’ebé foin remata husi universidade no ensinu sekundariu ne’ebé mukit esperiensia mak bele koloka sira ba halo estajiu hodi hariku sira nia abilidade profisional.
Maibé tuir nia katak, saida mak akontese iha programa ne’e, Prezidente Autoridade ba RAEOA, Arsenio Paixão Bano uja nia poder hodi politiza tiha estajiu profisional ne’e rekruta de’it militante radikal sira husi FRETILIN iha rai-ketan Ambeno, no foin sa’e sira ne’ebé mai husi partidu seluk lahetan oportunidade.
“Ha’u simu informasaun husi komunidade sira katak, rekrutamentu iha RAEOA ne’e mosu iregularidade tanba, loke vaga ne’e iha loos situasaun pólitika, kampaña eleitorál ba eleisaun parlamentár tinan 2023, tanba ne’e ita husu governu tenke tau atensaun ba iregularidade sira ne’e, no loke investigasaun ba programa APS,” deputadu Natalino Dos Santos levanta kestaun ne’e iha sesaun plenaria Parlamentu Nasionál , Segunda 10 Jullu 2023.
Deputadu CNRT husi munisipiu Kovalima ne’e hatutan, programa APS (Ami Prontu Serbisu) ne’e, kuaze ema nain 400 resin mak aplika, maibé maioria militante FRETILIN de’it mak nakonu iha laran. No, oras ne’e Arsenio Bano kontinua orienta membru APS sira nadodon ba forma iha banku, hodi loke sira nia konta bankaria atu prosesa sira nia pagamentu.
Membru APS sira ne’e mak durante tempu kampaña eleitor hala’o atividade door to door partidu FRETILIN nian hodi tenke vota ba sira atu hetan votu, maibé povu Ambeno matenek hodi fó de’it votu validu hamutuk 15000 resin ba FRETILIN, no CNRT hetan votu validu hamutuk 19000 ne’ebé oras ne’e laiha ema ida mak tama iha estrutura governasaun atual kompara ho munisipiu balun ne’ebé CNRT ladun hetan votu barak, maibé hetan fatin barak iha estrutura governu.
Deputadu CNRT husi RAEOA, Firminio Taeki mós haforsa kestaun ne’e katak, governu tenke loke duni prosesu investigasaun ida ba programa APS ne’e, tanba tuir nia katak, iha duni politizasaun, no iregularidade barak. No husu mós tenke loke investigasaun criminal no auditoria ba projetu infraestrutura sira iha RAEOA ne’ebé barak mak abandonadu, maibé autoridade RAEOA kontinua loke tenderizasaun hodi fasilita de’it kompañia Camarada (FRETILIN) sira ne’ebé durante ne’e apoiu iha kampaña ba eleisaun prezidensial no parlamentar.
Bano akompaña husi Sekretária Rejionál Adjunta Prezidente Autoridade Asuntu Reforsa Institusionál, Leonia da Costa Monteiro, Sekretária Rejionál Adjunta Prezidente Autoridade Asuntu Sosiáis, Maximiano Neno, no membru autoridade sira seluk hahu lansa programa APS ne’e iha aldeia Ulas, suku Taiboko, sub-rejiaun Pante Makassar iha loron Tersa 04 Abril 2023.
Durante seremonia lansamentu, Bano deklara, “APS” nia objetivu mak atu reduz númeru dezempregu, forma joven finalisa sira prepara joven sai rekursu profisional tuir lei funsaun públika nian, nune’e futuru bele lori RAEOA ba oin.
Programa Ami Prontu Servisu “APS” hanesan serbisu estajiu, maibé ho salariu fahe ba kategoria komunikasaun, transporte, no alimentasaun.
Bano ho nia kroni sira ikus mai uja APS ne’e nu’udar bala musan di’ak ida ba partidu FRETILIN, tanba joven sira ne’ebé hakarak liu iha APS ne’e tenke automatikamente sai nu’udar ekipa door to door durante kampaña eleisaun parlamentar, no faktu hatudu momoos katak, APS ne’e mesak FRETILIN de’it.
