DILI (TOP) – Grupu Nasionál Timor-Leste iha Parlamentu Nasionál simu ona komvite husi Asembleia Uniaun Inter-Parlamentár hodi partisipa reuniaun Asembleia iha Luanda, Angola.
"Iha Grupu Uniaun Inter-Parlamentár ne'e, Parlamentu Nasionál simu ona konvite atu partisipa iha asembleia ba 147 iha Luanda, Angola. Entaun, ita komu mandadu ne'e hotu, nune'e mak tenke hili fali foun. Horsehik ami hala'o eleisaun ne'e, ha'u re-eleitu hanesan Prizidente Uniaun Inter-Parlamentár, para halo preparativu sira hanesan baibain tinan-tinan Uniaun Inter-Parlamentár ne'e enkontru asembleia jerál sempre halo tinan ida dala rua iha fulan Marsu no Outubru," hateten Prezidénte Uniaun Inter-Parlamentár Veneranda Lemos, ba Jornalista sira iha Parlamentu Nasionál, Dili, Kinta 13 Jullu 2023.
Deputada husi bankada CNRT ne’e katak, iha loron 23-27 fulan Outubru tinan ida ne’e sei halo iha kapital Luanda ho tema prinsipál ba asembleia ne’e mak foku ba paz, justisa, no hametin instituisaun sira.
“Depois iha asembleia nia laran iha mós reniaun ketak-ketak ne'ebé ko'alia kona-ba trafiku humanu, direitu humanu, feto iha Parlamentu, direitu feto nian, administrasaun no engloba matéria lubuk ida,” deputada husi munisipiu Baukau ne’e esplika.
Lemos hatutan, Parlamentu Nasionál, liu-liu Prezidénte Parlamentu Nasionál, fó ona autorizasaun ba membru Uniaun Inter-Parlamentár bainhira atu ba parlamentár hodi partisipa iha ne'ebá deputadu sira sei hili materia relevante atu bele partisipa.
"Nune'e bainhira ita fila mai Timor, ita hato’o relaroriu di'ak ba Parlamentu Nasionál, no mós bele fó rekomendasaun ba governu liu-liu ba ministériu relevante atu bele tau iha atensaun no tau iha implementasaun, ba pontu importante sira ne'ebé mak mosu iha debate jerál," nia imfroma.
Membru asembleia ne'e hamutuk 170 resin, ema hotu antuziasmu tanba iha tema sira ne'ebé importante tebes ba nasaun ida-idak. Tanba iha ne'ebá ne'e bainhira ba abertura hotu, depois ajenda mai ona kona-ba importansia sira hanesan halo tratamentu igualdade, no trafiku humanu.
Estrutura ba Uniaun Inter-Parlamentár ne'e hamutuk ema na'in 12, Prezidénte ida, vise ida, no sekretária ida, membru permanente nain neen ho suplente nain neen (6).
