DILI (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano hateten, salariu ba estajiariu profisional sira ka koñesidu ho naran “Ami Prontu ba Serbisu” (APS) ne’ebé hatama de’it militante radikal FRETILIN sira iha Oe-Kusi Ambeno sei simu salariu ho montante dolar Amerikanu ha’at nulu (US$ 40.00) kada fulan.
Arsenio Bano halo partidu FRETILIN repete hikas prátika Marxizmu hanesan iha tinan 1974-1980 iha ai-laran ba povu Oe-Kusi Ambeno hodi fó terus ba povu sira ne’ebé ninia konviksaun politika diferente ho partidu FRETILIN nian.
Ambeno oan se de’it mak hakarak hetan netik benefisiu ruma husi orsamentu millaun $800 resin ne’ebé estadu aloka ba iha Oe-Kusi Ambeno mak iha obrigasaun tenke tama iha partidu FRETILIN alias kumu liman. Ba sira ne’ebé lakohi kumu liman mak sei la hetan oportunidade atu hetan serbisu ruma, tanba atu hetan serbisu tenke iha kartaun militante FRETILIN.
Prátika ida ne’e hanesan loos ho dutrina Marximu ne’ebé aplika iha ai-laran durante tempu rezistensia. Komandante FALINTIL barak ne’ebé iha esperiensia maka’as kona-ba komanda funu, maibé bainhira lakohi kumu liman tenke hetan kastigu no elimina tiha hanesan esperiensia Proklamador Francisco Xavier do Amaral nian.
Ba mestre sira ne’ebé la kumu liman ka la iha kartaun militante FRETILIN mak sei transfer hotu ba área rural nu’udar “kastigu” ida, tanba la kohi kumu liman! Nune’e mós ba funsionariu sira iha obrigasaun atu kumu liman se hakarak atu kontinua serbisu ka la hetan “mutasi” ba fatin do’ok ka sai husi Oe-Kusi Ambeno.
Programa estajiu profisional ne’ebé nakfilak ba programa politizasaun partidu FRETILIN nian iha Oe-Kusi Ambeno ho naran “Ami Prontu ba Serbisu” (APS) hanesan loloos ho dutrina Marxizmu nian. Programa APS ne’e mak programa estajiu profisional katak, bainhira foin sa’e sira ne’ebé foin remata husi universidade no ensinu sekundariu ne’ebé mukit esperiensia mak bele koloka sira ba halo estajiu hodi hariku sira nia abilidade profisional.
Arsenio Bano esplika, APS ne'e la'ós rekrutamentu, maibé atu fó oportunidade ba joven sira ne'ebé mak remata ona universidade ka sekundaria bolu sira hodi aprende.
Bano haktuir, autoridade identifika hodi fó osan transporte ba membru APS sira ne’e loron rua nia laran, hanesan osan ha’an nian ho hemu nian mak US$ 5.00.
“Entaun, salariu estajiu profisionál APS sira fulan ida kada ema simu US$ 40.00,” Bano hateten ba jornalista sira iha Farol, Dili foin lalais.
Nia hatutan, membru APS sira ne’e sei hala’o estajiu profisional durante fulan ne’en (6) nia laran mak remata.
Bano dehan, membru APS oras ne’e hamutuk ema nain 1900, no sei prontu atu simu tan ema nain 1000 hodi kompleta ba 2900.
Maske Bano defende katak, programa APS ne’e ninia inisiu nakloke ba joven sira hotu iha Ambeno la hare ba koor partidu, rasa no seluk tan, maibé faktu hatudu, membru APS sira ne’e mesak mai husi FRETILIN de’it ne’ebé uja sira hanesan kuda buru halo door to door durante periodu kampaña parlementar liuba.
Ho faktu hirak ne’e mak bankada CNRT ezije investiga rekrutamentu APS iha Ambeno Bano ho nia membru autoridade sira durante ne’e politiza buat hotu ba interese partidu FRETILIN nian ne’ebé ikus mai hasoru derrota maka’as hahu kedas husi eleisaun ba prezidensial to’o eleisaun parlamentar.
