DILI (TOP) - Empreza tolu (3) hanesan Emperior, S.A., Prime Timor Enterprise, Lda., Sali-Magu Holding & Co, S.A. no Emperior, S.A hahu aprezenta sira nia proposta investimentu ba Ajénsia Promosaun Investimentu no Esportasaun, I.P. (TradeInvest Timor-Leste).
Aprezentasaun proposta investimentu ne’e iha loron 17 Marsu 2026.
Meza Komisaun Tékniku ne’ebé kompostu hosi liña ministériu no ajénsia relevante sira, ne’ebé lideradu hosi Ajénsia Promosaun Investimentu no Esportasaun, I.P. (TradeInvest Timor-Leste) mós rona ona aprezentasaun proposta investimentu hosi empreza tolu ne’e atu halo análiza tékniku ba planu negósiu hosi empreza sira nian tuir lei no regulamentu sira hodi aplika ba Deklarasaun Benefísiu (DB) no Akordu Espesiál Investimentu (AEI) ho baze Lei Investimentu Privadu Nú. 15/2017 no lei relevante sira seluk.
Iha oportunidade ne’e, Empreza Prime Timor Enterprise, Lda. aprezenta estratéjia investimentu ho valór US$ 26.4 milliaun hodi dezenvolve produsaun na’an karau iha Suku Beco, Postu Administrativa Suai, Munisípiu Covalima. Empreza nasionál ne’e iha vizaun ba investimentu ne’e atu halo redusaun ba dependénsia Timor-Leste nian iha produtu importadu sira liu-liu na’an ba konsumu no loke dalan atu halo esportasaun ba Xina no Indonézia, nune’e mós kria kampu traballu ba Timor-oan sira.
Enkuantu, Empreza Sali-Magu Holding & Co, S.A investe iha setór turizmu no infraestrutura ho investimentu valór US$ 6.2 milliaun hodi harii edifísiu multiuzu andar haat iha Bebonuk, Dili. Projetu ne’e konsidera estratéjiku tebes hodi prepara kapitál Dili nu’udar uma-na’in ba Simeira ASEAN 2029, ho kapasidade atu kria empregu ba sidadaun lokál hamutuk na’in 100.
Iha parte seluk, Empreza Emperior, S.A. aprezenta proposta ho valór US$510 milliaun ho planu estabelese indústria transformadora tabaku iha Maubara, Munisípiu Liquiça.
Estratéjia ne’e ho objetivu atu kria oportunidade servisu ba Timor-oan sira, ne’ebé kobre hosi parte kultivasaun to’o fabrikasaun, ho meta atu esporta produtu ba merkadu ASEAN, CPLP, no Pasífiku.
Komisaun Tékniku asegura katak prosesu analiza ne’e hala’o ho rigorozu hodi hili investimentu sira ne’ebé iha kbiit finanseira no sustentabilidade ba tempu naruk. Rezultadu hosi sorumutu ne’e mós sai baze importante ba desizaun Governu nian hodi fó apoiu ba dezenvolvimentu setór produtivu sira iha rai-laran, hodi dudu kresimentu ekonómia ne’ebé inkluzivu ba povu Timor-Leste.
Diskusaun meza tékniku ne’e lidera hosi, Diretór Ezekutivu Adjuntu TradeInvest Timor-Leste, Duilio Marino Gusmão Araújo da Silva, ne'ebé akompaña direita hosi Diretór Ezekutivu TradeInvest Timor-Leste, Arcanjo da Silva, no Koordenadór Jerál Gabinete Ministru Koordenadór ba Assuntu Ekonómiku (MKAE), Jorge Martins, ne’ebé partisipa másimu hosi reprezentante instituisaun relevante sira.
