DILI (TOP) - Governu liu husi reuniaun Konsellu Ministru sira iha loron Kuarta, 25 Marsu 2026, halo ona nomeasaun ba Afonso dos Santos hodi asume kargu nu’udar Komandante-Jerál (KomJer) Polisia Nasionál Timor-Leste hodi troka Henrique da Costa, no Natércia Eufrásia Soares Martins nu’udar segundu Komandante-Jerál, ba períodu tinan tolu, iha rejime komisaun serbisu.
Konsellu Ministrus mós hato’o apresiasaun ba dedikasaun no serbisu ne’ebé hala’o husi Komisáriu-Jerál sesante no Segundu Komisáriu-Jerál, Henrique da Costa no Pedro Belo, ida-idak.
Nune’e mós ho proposta hosi Ministru Interiór, no haree ba desizaun anteriór, aprova ona projetu Rezolusaun Governu ba ezonerasaun Natércia Eufrásia Soares Martins hosi kargu Diretora Ezekutiva Servisu Migrasaun nian no nomeasaun ba Superintendente-Xefe PNTL, Jorge Monteiro, iha komisaun servisu, ba períodu tinan tolu.
Konsellu Ministrus analiza aprezentasaun hosi Ministru Interiór, Francisco da Costa Guterres, kona-ba konkluzaun relatóriu finál hosi Komisaun Monitorizasaun no Fiskalizasaun Konkursu Públiku Admisaun ba Kursu Formasaun Ajentes PNTL nian, ne’ebé kria tuir Rezolusaun Governu n. 10/2026, loron 11 fulan-fevereiru, ne’ebé identifika evidénsias sufisientes lubun ida hodi hatudu ezisténsia irregularidades materiais ne’ebé grave iha prosedimentu konkursu nian ida-ne’e.
Relatóriu ne’e mós aprezenta medidas estruturál lubuk ida ne’ebé sei adota ba konkursus iha futuru no rekomenda posibilidade atu instaura (hahú) prosedimentus hodi buka-hatene responsabilidades, kona-ba kondutas ne’ebé bele sai nu’udar violasaun ba devér funsionál ka norma legál sira.
Haree ba irregularidade ne’ebé identifika ne’e, Konsellu Ministrus aprova projetu Rezolusaun Governu ne’ebé determina anulasaun parsiál ba Konkursu Públiku Admisaun iha Kursu Formasaun Ajentes Polísia Nasionál Timor-Leste 2025 no mandatu ba abertura konkursu iha tinan 2026.
Rezolusaun Governu ne’e determina repetisaun provas selesaun (kulturál, psikolójika no saúde) ba kandidatu hotu-hotu ne’ebé admitidu iha faze inisiál (prova dokumentál) konkursu nian.
Aleinde ne’e, Ministru Interiór hetan instrusaun atu nomeia juri foun ida, ho kompozisaun reforsada ida ne’ebé inklui entidade nasionál no internasionál sira ho kompeténsia rekoñesida, no atu kria Komisaun Supervizaun no Fiskalizasaun independente ida, ho partisipasaun parseiru internasionál sira, ho objetivu atu garante transparénsia, legalidade no imparsialidade hosi faze hotu-hotu prosesu nian.
Rezolusaun Governu ne’e hato’o mós rekoñesimentu ba dedikasaun no serbisu ne’ebé Komisaun Monitorizasaun no Fiskalizasaun hala’o, hodi destaka ninia kontribuisaun ba salvaguarda kredibilidade instituisaun públika no direitus sidadaun sira nian.
