DILI (TOP) - Ekipa Servisu Setor Operasaun hosi Servisu Migrasaun, hala'o atividade operasaun rutina no konsege asegura sidadaun estranjeiru na'in 7, iha Dili laran tanba uza vistu turista hodi halo atividade komersial.
Tuir informasaun ne’ebé The Oe-Kusi Post (TOP) asesu husi pájina Serviços Relações Públicas katak, bazeia ba planu operasional ne’ebé iha, ekipa operasaun Servisu Migrasaun tama sai otelaria no fatin karaoke iha Kapital Dili laran, hodi halo inspesaun ba sidadaun estranjeru sira no konsege asegura sidadaun estrajeiru feto nain 7 ne’ebe vistu.
Iha operasaun ne'e Ekipa Servisu Migrasaun haree liuba pasaporte no violasaun vistu tanba tuir Sistema Jestaun Fronteira nian detekta katak sidadaun hirak ne'e vistu mate ona nune'e ekipa servisu halo planu operasaun hudi buka tuir to hetan iha area Dili Oeste nian.
Hafoin asegura sidadaun nain 7 ne’e ekipa lori kedas ba edifisiu Servisu Migrasaun iha Ministériu Interior, Vila-Verde hodi submete ba prosesu identifikasaun.
Iha prosesu identifikasaun investigador Servisu Migrasaun nian notifika katak maioria sidadaun estranjeiru sira ne'e uza vistu turista hodi buka fali servisu hetan lukru no balu hela liu tempu ne'ebe determina maibe lahalo prolongasaun. Nune'e sira konsidera halo violasaun ba Lei Migrasaun no Azilu, iha artigu 143 no aplika sansaun selu multa, maibė sira ne'ebé rekuza, sei submete lista naran ba iha Ministériu Públiku atu prosesa tuir lei.
