(TOP) - Komando Komponente Forsa Terrestre (CFT), realiza serimónia tomada posse hodi fó posse ba Tenente Coronel graduadu, Gregorio B. Correia no mós Kapitaun Baldino Martins hodi subtitui Komandante Sesante Major Petrus Ceunfin no Major Nogueira D. Q. Laranjina, nu’udar Komandante no segundu komandante 2° Batallaun.
Tuir media Komponente Forsa Terrestre katak, serimónia toma posse ne’e hanesan mudansa interna, akontese tanba komandante sesante hetan oportunidade hodi ba tuir treinamentu iha rai-liur.
Hafoin toma pose, Komandante Komponente Forsa Terrestre, Koronel Domingos da Costa Soares “Dobu”, husu ba komandante foun 2° Batalhão, atu serbisu ho másimu hodi hadia di'ak liu tan programa sira ne'ebé estabelese ona husi komandante sesante-sira.
"Estrutura tomak, ha'u husu ba komandante na’in-rua aktvidade diária labele para, labele halo soldadu-sira baruk, labele halo imi nia soldadu sira desmoraliza, fó hanoin ba sira, motiva sira kria inisiativa hodi halo sira nafatin kontente, no kontinua book-aan," Coronel "Dobu" hato’o lia-menon ne’e hafoin fó posse ba susesor sira iha Baze Baucau iha loron Segunda, 29 Setembru 2025.
Koronel “Dobu” hatutan, sai komandante la’os de’it atu komanda soldadu-sira, maibé sai hanesan mahon ida hodi tau matan no motiva sira oinsa sai militar ne'ebé profisinal no disiplina, no forte hodi hala’o misaun ho di'ak.
"Buka meius sai hanesan aman no inan ba imi nia soldadu-sira, labele haka’as sira ba serbisu, maibé identifika mós sira-nia problema, hare sira hanesan imi nia oan, kuidadu no hadomi sira mak imi sei sai komandate ne'ebé di'ak," Koronel Dobu fó hanoin ba komandante foun sira.
Eis Komandante Unidade FALINTIL atual Komandte CFT husu ba soldadu sira nafatin adapta ho ambiente foun hodi bele hala’o aktividade hotu-hotu ho vontade di’ak.
