Ministru Saúde Indonézia tun direita konsulta Kay Rala Xanana Gusmão

DILI (TOP) – Lider Karismátiku, Kay Rala Xanana Gusmão remata ona prosesu check up ba nia kondisaun saúde ne’ebé atende direitamente husi Major Jeneral Tentara Nasional Indonesia (TNI) atual Ministru Saúde Repúblika Indonézia (RI), dotor Terawan Agus Putranto ka dotor Terawan iha sentru ospital exérsitu Gatot Soebroto ka Rumah Sakit Pusat Angkatan Darat Gatot Soebroto (RSPAD).

Informasaun ne’ebé The Oe-Kusi Post (TOP) asesu husi ospital Gatot Soebroto, prosesu konsulta saúde ba Kay Rala Xanana Gusmão nian ne’e remata ona no rezultadu hatudu nia kondisaun saúde estavél hela, laiha moras boot ruma.

“Dotor Terawan ho nia ekipa médiku espesialista sira mak tun direitamente halo atividade konsulta ba Xanana nia kondisaun saúde iha ospital militar Indonézia Gatot Soebroto ne’e,” hateten fontes ida husi RSPAD Gatot Soebroto ba The Oe-Kusi Post Sesta 20 Novembru 2020.

Hospital militar Indonézia Gatot Soebroto. Foto Espesial.

Nia hatutan, atividade konsulta ne’e remata tiha ona no la’o ho di’ak tebes, no rezultadu husi konsulta ne’e hatudu rezultadu kondisaun saúde eis Prezidente Repúblika dahuluk ne’e estavél hela.

Kay Rala Xanana Gusmão sai husi Timor-Leste ba Jakarta, Indonézia iha loron Kuarta 18 Novembru 2020 oras tuku 2 lorokraik ho aviaun jet privadu (Jet Hawker 800), no médiku ne’e dehan, prosesu konsulta saúde ba Xanana hala’o kedas iha loron Kinta 19 Novembru 2020.

Notisia relevante: Deslokasaun Xanana ba Jakarta hamosu “polemika” iha rai laran

“Maibé, iha dadersan tuku 7 de’it nia iha ospital ona hodi kumpri ajenda ba konsulta, no to’o direitamente halo konsulta saúde tuir ajenda ne’ebé aprova tiha ona,” médiku ne’e esplika.

“Iha loron 19 Novembru tuku 10 dadersan Ministru Saúde doutor Terawan tun direitamente halo serbisu check up ba Xanana, tanba iha tinan 2015 mós nia mak halo check up ba Xanana,” médiku espesialista ne’e esplika.

Se maka dotor Terawan Agus Putranto?

Terawan Agus Putranto

Ministru Saúde Repúblika Indonézia (2019-2024)

Moris iha: Jogjakarta, 5 Agustu 1964.

Kareira Profisional

2009	Ekipa médika Prezidente Indonézia Xefe Asosiasaun Dotor Espesialista Radiologia Indonézia Xefe World International Committee of Military Medicine Xefe ASEAN Association of Radiology
2015	Xefe ospital militar Gatot Soebroto
2016	Akademia Siensia Jogjakarta (AIPYo) Jogjakarta, Indonézia
Profisaun	Militar Indonézia
Método tratamentu	Fase kakutak no *Digital Substraction Angiogram (DSA)*
1990	Dotor Indonézia
2019-2024	Ministru Saúde Indonézia

Edukasaun

1990

Lisensiatura, Fakuldade Medisina, Universidade Gajah Mada (UGM)

2004

Mestradu, espesialista radiologia, Universidade Airlangga, Surabaya

2013

Doutorado, Fakuldade Medisina, Universidade Hassanuddin (Unhas), Makassar.

Fontes: TEMPO

KORESAUN:

Notisia ne'e iha mudansa iha fontes informasaun. Fontes loloos maka mai husi ospital Gatot Soebroto rasik. Ba mudansa ne'e TOP husu deskulpa ba públiku no le'e nain-sira.

Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.

Xefe Redasaun & Editor