Deslokasaun Xanana ba Jakarta hamosu “polemika” iha rai-laran

DILI (TOP) – Lider Karismátiku Kay Rala Xanana Gusmão foin mak ho aviaun jet privadu semo sai husi aeroportu internasional Nicolau Lobato Comoro, Dili hamosu kedas interpretasaun oioin iha rai-laran, liliu sira ne’ebé oras ne’e ka’er ukun iha estrutura governu atual.

Reasaun ba viazen Xanana nian ne’e bele nota iha komentariu sira iha mundu virtual liliu iha plata forma media sosial (Facebook).

Observasaun The Oe-Kusi Post (TOP) hahu kedas husi Lecidere ba to’o aeroportu Comoro katak, Xanana sai husi nia rezidensia iha oras tuku 1 liu, no aviaun semo sai husi aeroportu iha oras tuku 2 lorokraik iha loron Kuarta 18 Novembru 2020. Xanana sai ba Jakarta ho aviaun Jet Hawker 800 koor mutin.  

Lider Karismátiku Kay Rala Xanana Gusmão iha aeroportu Nicolau Lobato, Comoro, Dili Kuarta 18 Novembru 2020. Foto TOP/Raimundos Oki.

Figura sira ne’ebé akompaña lider karismátiku ne’e iha aeroportu Comoro de'it maka hanesan José Luis Guterres, Avelino Coelho, Nelio Isaac Sarmento, no Miguel Manetelu.

Tuir observasaun The Oe-Kusi Post nian katak, Kay Rala Xanana Gusmão kumpre tebes regras mundial nian kona-ba prevensaun moras Covid-19 hanesan molok tama ba área aeroportu laran, Xanana hahu uja ona maskára, no fase nia liman molok sa'e ba aviaun. 

Prezidente Konsellu Diretiva partidu CNRT, Dionisio Babo Soares katak, Xanana halo viajen ba Jakarta hodi halo check up rutina ba nia saúde.

“Tuir loloos ba ona iha fulan hirak liuba, maibé tanba situasaun Covid-19 maka planu viajen ne’e suspende tiha,” hateten Babo ba The Oe-Kusi Post iha Dili Kuarta 18 Novembru 2020.

Mosu mós espekulasaun barak no komentariu barak katak, kondisaun saúde eis Komandante em Chefe das FALINTIL ne’e grave tebes, maibé eis Ministru Negósiu Estranjeiru no Kooperasaun Dionisio Soares Babo rejeita espekulasaun hirak ne’e.



 

“Maun Xanana fizikamente estável loos no laiha moras ruma maka impata ka la di’ak ba nia saúde. Maun Xanana nia kondisaun saúde di’ak loos maske halo viajen intensivu tebes ba suku barak haleu Timor desde fulan hirak liu ba,” Babo esplika hodi haloos espkulasaun sira ne’ebé oras ne’e espalla iha sosiedade Timor nia le’et.

Nia hatutan, check up rutina ne’e halo periodikamente hodi bele kontrola di’ak nia kondisaun saúde.

“Graças a Deus to’o ohin loron ba Maromak tulun no fó saúde ida ne’ebé di’ak tebes no ita nia Maun Xanana halo serbisu ho di’ak”.

Babo dehan, Xanana rasik sente di’ak hela, maibé partidu CNRT liu husi estrutura, kuadru no militante sira tomak mós fó korajen atu Xanana ba konsulta.

Nia dehan maske sente di’ak hela, maibé depois rona hanoin hotu ikus mai nia desidi hodi ba konsulta no tuir planu sei fila mai Timor-Leste iha semana ruma nia laran.

Prezidente CDN partidu CNRT ne’e mós husu ba kuadru no militante sira hotu lalika hakfodak espekulasaun sira ne’ebé oras ne’e la’o hela.

Ekipa ne’ebé akompaña Xanana nia viajen ba rai liur ne’e mak hanesan eis vise Ministra Saúde Elia Amaral, Jacinto Rigoberto no Tomas do Rosario Cabral.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE