DILI (TOP) – Partidu vensedor eleisaun parlamentar CNRT ofisialmente halo ona koligasaun ho Partidu Demokrátiku atu forma governu dasia nian, maibé bazeia ba informasaun balun ne’ebé The Oe-Kusi Post (TOP) asesu, PD oras ne’e hatama tan lista foun ida hodi husu no ezije membru governu barak, no situasaun ne’e halo Prezidente partidu CNRT, Kay Rala Xanana Gusmão tenke husik hela enkontru entre partidu rua ne’e iha JL Villa, Fatuhada-Dili iha loron Kinta 31 Juñu 2023.
Ho situasaun ne’e, informasaun balun ne’ebé TOP asesu husi kuadru CNRT balun katak, PD foin hatama tan lista foun atu kontinua husu membru governu.
“Sira agora iha nain 17, no sei hakarak husu tan. PD iha problema interna, maibé ita husu ba sira atu rezolve lai sira nia problema interna ne’e. CNRT laiha problema ida,” katak kuadru CNRT ba The Oe-Kusi Post (TOP).
Ho situasaun ne’e, hafoin sormutu entre Prezidente Repúblika ho Primeiru-Ministru Indizitadu, Kay Rala Xanana Gusmão no Primeiru-Ministru, Taur Matan Ruak (TMR) iha Palásiu Prezidensial iha loron Sesta 30 Juñu 2023 mosu deklarasaun ida husi Prezidente Partidu Libertasaun Popular (PLP) katak, PLP prontu apoiu governu.
“PLP prontu apoiu governu,” katak Prezidente PLP, Taur Matan Ruak ba jornalista sira iha Palásiu Prezidensial Aitarak-Laran, Dili, Sesta 30 Juñu 2023.
Molok hasai deklarasaun ne’e mós TMR responde uluk ona pergunta jornalista sira nian kona-ba haketak malu ka durante ne’e politikamente do’ok malu itoan, maibé Prezidente PLP ne’e hatan ho lian Indonézia katak; “Jauh di mata, dekat di hati” katak, “do’ok iha matan, besik iha fuan”.
Tuir ajenda husi Palásiu Prezidente nian katak, prezensa Primeiru-Ministru, Taur Matan Ruak ho Primeiru-Ministru Indizitadu, Kay Rala Xanana Gusmão nian ne’e atu ko’alia kona-ba prosesu tranzisaun governu atual ba governu foun nian ne’ebé sei simu pose iha loron Sábadu 1 Jullu 2023.
"Ha’u só fó espasu ba lider na'in-rua ne'e hasoru malu hodi diskute kona-ba tranzisaun governu daualu ba governu dasia," katak PR Horta.
“Ita simu Primeiru Ministru sesante últimu dia nu'udar xefe governu hodi aban halo ninia diskursu, iha loron hirak ba kotuk sempre hatete tiha ona agradese boot ba Primeiru Ministru sesante tanba iha tempu ne'ebé nia lidera hasoru todan ka situasaun difisil iha rai laran.”
Primeiru Ministru indijitadu Xanana haktuir, sei lakomenta, tanba xefe estadu ko'alia ona kona-ba hasoru malu entre prezidente repúblika ho primeiru ministru governu daualu Taur Matan Ruak.
" Hau sei la ko'alia tan, saida mak Prezidente repúblika Jose Ramos Horta ko'alia ona kona-ba ami nia hasoru malu," haktuir Xanana.
Estrutura provizoriu ba governasaun foun ne’e agora kuaje nain 60 resin, no situasaun ne’e halo estrutura bokur demais, no CNRT ho PD oras ne’e sei kontinua halo negosiasaun atu oinsa bele hetan estrutura governu ida ne’ebé ideal.
