Embaixador Ilidio: Ha’u informa buat hotu ba MNEK

DILI (TOP) – Embaixador Timor-Leste ba Japaun, Ilidio da Costa Ximenes hatete, serbisu diplomátiku hotu ne’ebé nia hala’o iha Japaun sempre informa hotu kedas, no halo koordenasaun uluk ho Ministériu Negósiu Estranjeiru no Kooperasaun (MNEK) nian maka foin hala’o.

Antes ne’e bankada FRETILIN iha Parlamentu Nasionál hato’o ezijensia ba Primeiru-Ministru atu halo ezonerasaun ba embaixador Ilidio, tanba konsidera nia serbisu diplomátiku durante ne’e iha Japaun orientadu liu ba nia grupu (ba nia partidu) politika. Maibé, embaixador Ilidio rejeita kedas deklarasaun FRETILIN nian ne’e.

“Buat hoto iha koordenasaun ho MNEC via email no falatório sira hanesan minute of meeting no quarterly report no mós email no korespondensia email no WhatsApp ba-mai,” hateten embaixador Ilidio via Chatting WhatsApp ba The Oe-Kusi Post foin lalais.

Embaixador Ilidio hatutan, serbidu diplomátika hotu ne’ebé nia hala’o iha Japaun ne’e reprezenta Estadu, la’os reprezenta fali grupu ida nian.

“Ha’u reprezenta Estadu, la’os servis partidu nain,” nia esplika.

Embaixador Ilidio husu, nia sala saida maka bankada FRETILIN ezije governu tenke ezonera nia?

“Ha’u sala saida. Se iha sala ruma. Se iha duni sala ruma, ha’u prontu atu kumpri saida de’it maka foti”.

Polemika ne’e mosu bainhira lider karismátiku Kay Rala Xanana Gusmão halo viajen ba Jakarta, Indonézia hodi halo konsulta ba nia saúde iha loron Kuarta 18 Novembru 2020, no iha loron hanesan mós Japaun fó sai palestra Kay Rala Xanana Gusmão nian iha Tokyo. Nune’e, hamosu konfujaun ba públiku liliu ba bankada FRETILIN rasik.

Aprezentasaun Kay Rala Xanana Gusmão nian iha Tokyo ne’e liu husi gravasaun video ne’ebé grava antes ona iha GMN TV iha loron 16 Novembru 2020 oras kalan, no Japaun foin fó sai gravasaun video ne’e iha loron Kuarta 18 Novembru 2020.

Notisia relevante: Deslokasaun Xanana ba Jakarta hamosu polemika iha rai laran

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE