DILI (TOP) – Jornalista hamutuk nain 16 hetan tan ona kartaun profisional husi Konsellu Imprensa Timor-Leste hafoin kumpri rekezitu sira ne’ebé iha.
Prezidente Konsellu Imprensa Timor-Leste Virgilio Guterres katak, Konsellu Imprensa Timor-Leste sente haksolok tebes bele atribui karteira profisional ba jornalista hamutuk nain 16 iha tinan ida ne’e maske hasoru hela dezafiu balun hanesan durante ne’e uja de’it osan duodecimo, no pandemia Covid-19.
Jornalista nain 16 ne’ebé hetan karteira profisional ne’e kompostu husi jornalista estajiariu sira iha tinan 2019 hamutuk nain 6 maka hanesan Jenice da Costa Pereira husi media Suara Timor-Lorosa’e (STL), Terezinha de Deus husi STL, Luciano Amaral husi Radio Timor Kmanek (RTK), Eugenio Marques mós husi RTK, no seluk tan.
Entretantu, jornalista sira ho direitu anterior hamutuk nain 10 maka hanesan jornalista Otelio Ote husi TVE, Expedito Dias Ximenes husi GMN, Francedes Suni husi GMN, Alexandre Asis husi GMN, Suzana Cardoso husi Media One Timor, Julito Ximenes husi Naunil, no Olga Soares husi Timor Post no seluk tan.
Iha mós atribuisaun sertifikadu ba organun komunikasaun hamutuk nain 13 ne’ebé eziste iha rai-laran inklui The Oe-Kusi Post.
“Haksolok boot maske ho situasaun difisil, Covid-19, no politika, maibé Konsellu Imprensa konsege halo seremónia atu atribuisaun karteira profisional ba jornalista sira,” hateten Prezidente Konsellu Imprensa Virgilio Guterres liu husi nia diskursu iha serimónia atribuisaun karteira profisional tinan 2020 iha salaun Delta Nova, Komoro, Dili, Sesta 18 Dezembru 2020.
Nia hatutan, atividade atribuisaun karteira profisional ba jornalista sira nu’udar atividade Konsellu Imprensa nian.
“Kada tinan tenke halo dala 2 ba jornalista sira, maibé labele la’o, tanba durante ne’e uja de’it duodecimo, no pandemia Covid-19,” nia afirma.
Nia dehan maske hasoru difikuldade barak durante tinan ida ne’e, maibé tuir nia katak, pelu-menus iha netik grupu jornalista lubuk oan ida hetan karteira profisional ne’e.
Jornalista Expedito Dias Ximenes liu husi nia diskursu husu ba Konsellu Imprensa atu hadi’ak liutan prosesu atribuisaun karteira profisional ba jornalista sira iha rai-laran.
