Indonézia apoiu ró ambulansia ho fuan, MF simu ho “laran makerek”

DILI (TOP) – Indonézia desidi ona apoiu osan hamutuk $200,000 ho “fuan moos no laran moos” atu tulun Ministériu Saúde hodi sosa ró ambulansia, maibé Ministru Finansas, Rui Gomes simu ho “laran makerek”, tanba muda fatin atu halo asinatura iha minutu ikus nia laran de’it.

Tuir ajenda protokolár nian ne’ebé The Oe-Kusi Post (TOP) asesu, serimónia asina akordu kooperasaun ba apoiu husi governu Indonézia ne’e, atu hala’o iha Embaixada Repúblika Indonézia (KBRI) iha, Farol-Dili, iha oras tuku 12:00, Kuarta 16 Dezembru 2020.  

KBRI halo preparasaun kompletu ona, inklui halo kedas live virtuál husi KBRI Dili ba Jakarta, maibé derrepente de’it, KBRI simu informasaun iha minutu ikus katak, Ministru Finansas Rui Gomes husu muda fatin asina akordu ne’e ba fali edifísiu Ministériu Finansa nian iha Ai-Tarak Laran, Dili.

Ajenda ne’ebé iha mós katak, akordu entre parte rua ne’e atu asina diretamente husi Ministru Finansa, Rui Gomes ho Embaixadór Indonézia ba Timor-Leste, Sahat Sitorus. Maibé, tanba Ministru Rui Gomes iha serbisu importante seluk, maka delega hikas kompeténsia ba diretór jerál Jestaun Mobilizasaun Rekursu External, António Freitas.

“Embaixador ho ami staff sira halai mak biban iha minutu ikus ba to’o Ai-Tarak laran. No fim asina duni, maibé rekaman de’it,” hateten staff KBRI ida ba TOP iha Ministériu Finansas, Ai-Tarak Laran, Dili, Kuarta 16 Dezembru 2020.

“KBRI set up hotu ona atu halo asina perjanjian ne’e secara virtual (virtualmente), maibé to’o ikus oin seluk hotu. Muda fatin derepente iha minutu ikus nian. La informa antes,” fonte KBRI ne’e afirma.

Ró ambulansia ne’e sei fasilita transporta pasiente sira husi postu Atauro mai kapital Dili hodi hala’o tratamentu saúde iha Hospital Nasionál Guido Valadares (HNGV).

Iha akordu kooperasaun ne’e, governu Indonézia sei transfere osan hamutuk $200,000 mai Timor-Leste iha loron 31 Dezembru 2020.

António Freitas relata, osan ne’e sei aloka hotu ba hola de’it ró ambulánsia, maibé iha balansu ruma ba osan ne’e maka sei bele hola tan ekipamentu seluk ne’ebé saúde presiza no fó treinamentu ba ema sira atu halo operasaun ba ró ne’e.

Maske mosu mudansa ba iha fatin asina nota intendimentu ne’e, maibé embaixadór Sahat Sitorus katak, apoiu ne’e mai husi fuan laran povu no Estadu Indonézia nian, atu tulun nia maluk Timoroan sira, liliu maluk sira iha postu Atauro.

“Ha’u lori governu Indonézia nia naran hakarak hato’o ajudu ne’ebé fó ho laran tebes. Ajudu ne’e atu hametin liutan relasaun amizade entre povu no nasaun rua,” embaixadór Sahat Sitorus esplika. 

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE