KAK prende ai-han fohuk iha programa Cesta Bázika iha Comoro

DILI (TOP) – Durante ne'e mosu alegasaun barak husi sidadaun sira kona-ba kualidade no kuantidade ai-han sira iha programa Cesta Bázika ne’ebé deskonfia la to’o valor osan ne’ebé antes ne’e governu rasik promete, no ai-han sira ne’e mós laiha kualidade.

Alegasaun sidadaun sira nian ne’e mós sempre hato’o ezijensia instutisaun Komisaun Anti-Korupsaun (KAK) hodi halo intervensaun.

Komisariu Adjuntu KAK ba Asuntu Prevensaun no Sensibilizasaun, Luis de Oliveira Sampaio lidera Ekipa Espesialista Anti-Korrupsaun (EAK) ba hala’o intervensaun immediate hodi prende ona batar fohuk, modo dodok no hapara obrigatoriamente atividade fahe ai-han iha programa Sesta Bazika iha Super Merkadu Dili Mart iha Rai-Kotu, Dili, tanba Kompañia Dili Mart fahe batar musan ho koto fohuk inklui modo dodok.

Tuir informasaun ne’ebé The Oe-Kusi Post (TOP) asesu husi site ofisial KAK nian katak CAC prende ona ai-han Cesta Bazika iha suku suku Comoro iha loron Kuarta 9 Dezembru 2020, maibé EAK sira detekta batar fohuk, koto no modo tahan dodok sira ne’e la merese ona atu fahe hodi populasaun konsumu.

“Komisaun laos hapara deit prosesu fahe ai-han bazika obrigatoriamente ba povu iha Suku Comoro, maibé prende mos ai-han sira ne’ebé fohuk ona hanesan batar, koto no modo tahan dodok sira”.

Komisariu Adjunto CAC ba Asuntu Prevensaun no Sensibilizasaun, Luis de Oliveira Sampaio hateten EAK no Komisaun la soi atu kompañia Dili Mart kontinua fahe aihan bazika sira tanba ai-han bazika fohuk sirak ne’e merese atu ba fó han fahi, la’os atu fahe fali ba povu kbi’it la’ek sira.

“Ami koalia tiha ona ho manager kompanha atu hapara distribuisaun ai-han bazika hanesan batar fohuk, koto no modo tahan dodok ba populasaun. Ai-han fohuk sira ne’e merese fó han ba animal ka fahi no la’os ba ita ninian povu,” katak adjuntu Komisariu KAK, Luis Sampaio.

Nia hatutan, ekipa EAK mós prende café falun balun tanba la tuir lista gramas no folin ne’ebé Ministeriu Komersiu no Industria (MCI) determina. Maibe, iha terenu Kompañia Dili Mart fahe la tuir ninian kilogaramas determinadu.

Sei iha konsekuensia seriu ba irregularidade ida ne’e no Komisaun sei bolu manager kompanha no responsabel programa Sesta Bazika nian iha MCI.

“Batar ne’ebé fohuk ho modo ne’ebé dodo kami (prende) no sei halo prosesu. Depois ami sei notifika Nain ba Loja (Dili Mart) ne’e ho ninian responsavel sira. Autoridade kompetente (iha MCI) ne’ebé mak durante ne’e akompanha. sira ninian responsabilidade atu halo supervizaun. Sira mai e sira haree hela mais husik hela deit. (Pesoal MCI) sira ohin iha ne’e hela mais sira haree deit no la intervein. Sasan sira ne’e la refleta kualidade ne’ebé mak ita nian povu merese hetan no valor ($25) ne’ebé mak iha,” katak Sampaio.

Sampaio dehan, Komisaun antes ne’e deskobre sirkumstansia hanesan iha fatin seluk’ Hera, Metinaro no Liquica, maibé kompañia no autoridade kompetente la hadia.

“Entaun ohin ami halo intervensaun hodi hapara distribuisaun Sesta Bazika ne’e. Ami aviza tiha ona mais sira lakohi hadia. Entaun ami hapara no lori sasan (fohuk ho dodok) sira ne’e ba no halo prosesu investigasaun tuir mai,” Sampaio afirma.

Iha parte seluk, deputada husi bankada CNRT, Virgina Ana Belo akuza governu komete korupsaun boot liu husi nia programa Cesta Bázika.

“Ita hare ne’e mosu korupsaun boot,” hateten Deputada Virgina liu husi konferensia ba imprensa iha salaun bankada CNRT iha Parlamentu Nasionál, Kuarta 9 Dezembru 2020.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE