DILI (TOP) – Durante loron hirak nia laran, reasaun públiku liliu Timoroan sira ne’ebé oras ne’e serbisu iha tasi-balun kontra maka’as deklarasaun husi membru governu ida katak ba rai-liur ne’e hodi “fokit manu-fulun” de’it. Kondenasaun hanesan mós mai husi partidu CNRT.
“CNRT kondena polítiku sira ne’ebé desagrada ka hatun maluk Tinoroan sira ne’ebé serbisu iha rai-liur ho lia-fuan hanesan fokit manu-fulun,” hateten Prezidente Conselho Directiva Nacional partidu CNRT, Dionisio Babo Soares ba The Oe-Kusi Post (TOP) iha Dili, Domingu 6 Dezembru 2020.
Babo esplika, maluk Timoroan sira iha Reinu Unídu no sira ne'ebé serbisu iha Korea-do-Súl, Auatralia ho rai seluk, serbisu iha indústria oin-oin. Husi fábrika, área turismo, otelaria, backery, serbisu públiku no indústria prosesamentu ba hahan, ho seluk tan. Sira barak estabelesidu ona iha ne’eba no sira fó mós esklola ba sira nia oan sira ho matenek oin-oin.
Nia dehan, maluk sira ninia serbisu ne'e, kada tinan sira haruka osan (remittances) entre USD 30-50 million (la'os númeru loloos, bele boot liu fali ida ne'e) mai Timor ne'ebé kontribui ba Produtu Interna Bruto maske osan sira ne'e diretamente ba individu ninia bolsu.
Eis Ministru Justisa no MNEK ne’e konsidera, husi sira nia serbisu, barak tebes maka halo ona mudansa iha sira nia família hanesan harii uma, halo negósiu hodi sustenta ekonomia família, haruka oan/alin/maun no seluk tan ba eskola iha nivel hotu, ne'ebé ninia retornu ekonómiku hodi suporta TL ninia kresimentu imediata no futuru importante tebes.
“Tanba ne CNRT kondena tebes ema ka polítiku sira ne’ebé hatun maluk sira ne’e no husu ba Timoroan sira ne’ebé serbisu iha rai liur atu kontinua servisu hodi hadia sira nia moris bo sira no família nia moris, no tulun mós ita nia rai Timor-Leste,” Babo komenta.
CNRT lamenta tebes ho atitude ne’ebé la valoriza no hatun ita nia maluk Timoroan sira ne’ebé serbisu iha rai liur ho lia-fuan ne’ebé la respeita maluk Timoroan sira ne’e.
Nia dehan, maske sira ba serbisu mesak, maibé sira mós ajuda ona governo Timor-Leste hamenus dezempregu no prepara mós sira nia oan sira aban-bainrua bele fila mai hodi dezenvolve Timor-Leste.
Entretantu, maske alokasaun osan ba setór produtivu sira ki’ik, foin lalais Ministru Agrikultura no Peska (MAP), Pedro dos Reis husu ba Timor oan sira labele ba bebeik rai-liur hodi buka serbisu “fokit manu-fulun”, maibé tenke hela metin iha rai laran hodi dezenvolve setor ne’e ho di’ak, tanba tuir nia katak, governu oras ne’e tau matan hela atu hadia setor ne’e maske realidade hatudu alokasaun osan ki’ik liu kompara ho osan ba “han-hemu” nian ne’ebé boot tebes.
