DILI (TOP) – Sekretária Estadu ba Igualdade Elvina de Sousa Carvalho hatete, nia la husu tan adisionál iha orsamenntu retifikativu hodi mantein de’it ho osan ne'ebé mak aloka ona atu kontinua ezekuta ba programa to’o tinan ne’e nia rohan.
"Ami la hausu tan osan maibé, ami halo ajusta interna de'it. SEI nia orsamentu la husu adisionál nein husu atu hasai fali husi Ministériu sira seluk Sekretáriu Estadu sira seluk nia osan," Sekretária Estadu ba Igualdade, Elvina de Sousa Carvalho hateten ba Jornalista sira iha Ministériu Finansas iha Aitarak Laran, Dili, Tersa 01 Agostu 2023.
Nia hatutan, SEI hetan alokasaun osan ba tinan ida ne’e hamutuk millaun US$ 2,152.00 resin hodi ezekuta ba programa prioridade rua. Husi montante osan alukadu ne’e, ninia ezekusaun to’o ona 43%.
"Programa prioridade rua ne'e ita bele dehan katak, ezekusaun ne'e atinji ona 43%, hamutuk ho Obligasaun no komprimisiu sira. Ne'ebé ezekusaun la'o di'ak, ha'u hatete de'it Katak, rekor husi Sekretáriu Estadu Igualdade, dezde uluk ate agora ultrapasa ona 90%. Ha'u espera no ha'u fiar katak, ami ida agora ami sei halo ezekusaun to'o 95%," nia promete.
Nia dehan, ho osan restu ne'ebé iha SEI kontinua programa loron 120 nian atu realiza programa sira ne'ebé mak defini ona, no mós programa diariu sira. Programa ida mak uza fundu transferesia ne'e hodi bele fó ba iha asosiasaun feto potensial sira atu halo programa kapasitasaun, no mós halo advokasia ba feto sira hodi partisipa iha eleisaun Suku.
"No mós hanesan ita hotu hatene katak, ami sei halo vizita ba munisipiu sira la'ós munisipiu hotu maibé, sei vizita munisípiu haat hanesan ne'e," nia informa.
Nia esplika, sei foku ba programa sira seluk atu halo diskusaun ba divizaun ba lei violensia domestika, no mós haree kona-ba insestu nian para haree kriminaliza insentu iha rai-laran.
Sei halo advokasia ba kandidata feto iha eleisaun suku
Nia mós, sei halo advokasia ba feto pontesial sira iha Timor laran tomak hodi kandidata an ba eleisaun Xefe Suku, tanba lei fó dalan ba ema hotu, la'ós mane de'it mak partisipa vida polítika, maibé feto sira mós bele, liu-liu sira ne'ebé potensial.
"Preparasaun SEI sei halo advokasia hodi husu para feto hotu tenke brani atu kandidata an ba eleisaun suku sira tanba, buat ne'ebé mak ita hotu tenke hatene maka lei fó dalan”.
Lei garantia partisipasaun feto iha vida polítika, maibé feto mós tenke brani hodi kandidata an. Depois kandidata an hotu mak tenke hanoin ona, saida maka atu halo.
"Advokasia ne'e ohin ami hato'o ona, sei ajuda ba asosiasaun feto potensial sira iha munisípiu no mós ba sosiedade sivil sira ne'ebé mak sempre sai parseiru ba SEI halo kapasitasaun ba feto sira hodi prepara ba kompete, ita espera katak iha tinan ida ne'e ha'u nia maluk feto partisipa iha eleisaun Xefe Suku as liu-tán, ida ne'e mak ita hakarak", nia esplika.
