DILI (TOP) - Emiradus Árabes Unidus (EÁU) hahú halo konstrusaun rezidénsia bá estudante feto sira iha Aitarak-Laran.
Lansamentu fatuk da-huluk hala’o ona hosi Prezidente Repúblika (PR), José Ramos-Horta, Primeiru-Ministru (PM), Kay Rala Xanana Gusmão hamutuk ho Embaixadór Emiradus Árabes Unidus, Abdullah Aldaheri iha Aitarak-Laran Dili iha loron Kuarta, 20 Maiu 2026.
Projetu ne’e finansia hosi Prezidente Emiradus Árabes Unidus, Sheikh Mohammed bin Zayed Al Nahyan ho ajénsia dezenvolvimentu Emiradus Árabes Unidus nian, UAE Aid atu bele akumula estudante universitária feto na'in 300 ho kategoria família kbiit la natón.
Embaixadór Abdullah Aldaheri esplika, objetivu prinsipál hosi projetu ne'e atu kria ambiente kulturál no sosiál ida ne'ebé integradu hodi kontribui prepara jerasaun futuru hosi talentu akadémiku kualifikadu no líder nasionál sira ne'ebé bele partisipa ativu iha konstrusaun futuru no avansa dezenvolvimentu sustentável iha Timor-Leste.
“EÁU ho TL fahe valór umanitária hodi servi komunidade kbiit laek sira, hakbiit labarik sira no hadi’a kualidade moris,” Embaixadór ne’e subliña.
Iha fatin hanesan, Prezidente Repúblika, José Ramos-Horta hateten área rezidensiál ne’e sei kompleta ho klínika ida, sala estudu, kafetaria no servisu komplementár sira seluk, nune’e mós área paisajizada sira iha nia perímetru nia laran.
Projetu ne’e nu’udár konstrusaun modernu ida ne’ebé sei implementa hosi empreza Areem Plus ho dezeñu arkitetóniku hosi empreza Gary Gilson Architects, tuir planu sei remata iha tinan 2027.
Edifísiu ne’e iha komponente prinsipál haat: alojamentu ba estudante sira ho kapasidade akumula estudante na'in 300, fahe entre kuartu duplu 20 no kuartu ho kama haat hamutuk 65; bloku ida ho apartamentu aluga 24, ho estúdiu, kuartu ida no kuartu rua; instalasaun komún sira inklui prasa sentrál, sala multiuzu, biblioteka, lavandaria no kafetaria ho kapasidade bá ema na'in 150; no klínika asesu públiku ekipadu ho farmásia, sala tratamentu no mini-merkadu.
Inisiativa ne’e halo parte iha relasaun bilaterál ne’ebé fahe entre Timor-Leste ho Emiradus Árabes Unidus, abranje kooperasaun iha área edukasaun, kapasitasaun institusionál no investimentu ekonómiku.
Projetu ne'e reflete vizaun hosi Prezidente Emiradus Árabes Unidus, Sua Alteza Xei Mohammed bin Zayed Al Nahyan ne'ebé tau aas liu edukasaun nu’udár investimentu estratéjiku ida iha kapitál umanu no edukasaun feto nian hanesan pilár sentrál ida hosi kompromisu Emiradus Árabes Unidus nian bá empoderamentu feto sira nian no sira nia partisipasaun iha área teknolojia, siénsia, enerjia artifisiál no enerjia.
Edifísiu ne’e konstrui iha Palásiu Prezidensiál Nicolau Lobato nia sorin, iha rai totál ho luan besik metru kuadradu 81.951 ka ektares 20,25.
Área konstrusaun totál hamutuk metru kuadradu 4,877 ne'ebé fahe bá andár tolu inklui bloku akomodasaun estudante nian hamutuk 3,276 m2 no edifísiu apartamentu nian hamutuk 1,392 m2.
Tuir planu, sei harii mós futuru Embaixada Emiradus Árabes Unidus (EAU) iha edifísiu ne’e nia oin.
