Oekusipost.com Bihala – Autoridade Rejiaun Administrativu Espesial Oe-Kusi Ambeno (RAEOA) hahu fahe ona foos ba kbi’it sira iha rai-ketan ne’e, no ema hamutuk nain 12 mak hetan ona apoiu iha aldeia Bihala, suku Bobokase.
Autoridade RAEOA fahe apoiu umanitaria ba orfonatu sira iha Sentru Topu Honis Mahata no Madre Fransicana sira iha Padiae inklui kbiit laek sira iha suku 18.
Apoiu umanitariu ne’e mak hanesan foos, masin-midar no nesesidade uma laran seluk tan iha suku Bobokase postu administrativu Pante Macassar.
“Ita hare rasik inan faluk kbiit la’ek sira ne’ebé enfrenta situasaun difisil tebes, balun hahan laiha, kondisaun uma laran mós susar tebes, tanba ne’e mak autoridade halo planu ida ne’e hetan orientasaun husi Prezidente Autoridade mai fó netik apoiu ruma ba sira,” hateten Xefe Gabinete Prezidente Autoridade ba RAEOA, Agustinho Caet ba Oe-Kusi Post iha aldeia Bihala, Suku Bobokase, Oe-Kusi Ambeno, Kuarta 29 Abril 2020.
“Apoiu hirak ne’e liliu saida mak sira persiza hanesan foos no nesesidade seluk ida ne’e bele responde ona saida mak sira presiza agora, hodi hein apoiu husi governu sentral kona-ba subsidiu familiar nian, maibé sei iha prosesu nia-laran, entaun nesesidade sira hanesan ne’e ita tenke atende urjente,” Caet esplika.
Nia hatutan, apoiu umanitáriu ne’e sei kobre suku 18 iha Oe-Kusi Ambeno.
“Ajudu ne’e ita hare liu ba ida ne’ebé ferik liu ona no katuas liu ona inklui labarik sira ne’ebé laiha inan-aman, sira presija tulun agora ita ajuda dadauk ona, tanba sira laiha meius seluk atu responde ba sira nia nesesidade lor-loron nian, hanesan loron hirak liuba ita ajuda ona orfonatu sira, no mós alin sira hela iha madre agora ita kontinua apoiu tan ba kbiit la’ek sira,” nia esplika.
Iha fatin hanesan, Xefe aldeia Bihala Tomas Nesi agradese ba apoiu ne’e.
“Ha’u nu’udar autoridade lokal sente kontente, tanba liu husi ajudu ida ne’e bele ajuda netik ami,” nia hateten.
Nune’e mós, benefisiariu Laek Terezia Anuno hato’o agradesementu ba apoiu ne’e husi autoridade RAEOA.
Apoiu umanitáriu ne’ebé mak hetan iha faze dahuluk iha suku Bobokase, aldeia Bihala mak hanesan Alda Obe, Maria Seo, Marselina Beno, Petronela Meko, Batista Nufa, Angelina Kebo, Juliana Kufat, Madalena Neno, Terecia Elo, Perpetua Anuno, Serafina Baineo, Carolina Quenat.
