Oekusipost.com Ambeno – Ekipa COVID-19 Rejiaun Administrativu Espesial Oe-Kusi Ambeno (RAEOA) hahu ona halo dezifekta ba sentru akollimentu rua, Fulolo ho Hotel-Lifau ne’ebé antes ne’e Ambeno oan sira uja hodi kumpre konfinamentu obrigatóriu durante loron 14 nia laran.
Diretór Interinu Saúde RAEOA, Luis de Jesus Neno katak, fatin rua ne’e mamuk ona, tanba ne’e mak presija dezinfekta.
“Ohin ita halo dezinfekta iha hotel lifau no rezidensia Fulolo, tanba fatin rua ne’e mamuk hela, ita nia ema sira ne’ebé mai iha kuarentena agora sira kumpre dever ona. Maioria sai tiha ona, falta nain 17 mak sei kumpre hela loron 14 ne’e,” hateten eis xefe sentru saúde postu Oe-Silo ne’e ba Oe-Kusi Post iha Oe-Kusi Ambeno, Tersa 28 Abril 2020.
Ekipa COVID-19 Ambeno halo ona dezinfektasaun ba sentru akollimentu Hotel-Lifaun, Oe-Kusi Ambeno. Foto Oe-Kusi Post/Abilio Elo Nini.
Enfermeiru ne’e afirma, rajaun halo dezinfekta ba fatin rua ne’e, tanba fatin rua ne’e mamuk total ona, no maske Estadu prolonga tan ona periodu Estadu emerjénsia ba fulan ida tan, maibé númeru Ambeno oan sira ne’ebé kumpre loron 14 oras ne’e menus ba dadauk ona.
“Maioria sai tiha ona, falta nain 17 mak sei kumpre hela konfinamentu obrigatóriu,” esplika Luis Neno.
Iha fatin hanesan Xefe Gabinete Prezidente Autoridade RAEOA, Agustinho Caet hateten, dezinfektasaun ne’ebe autoridade halo ho intensaun atu prepara ba estadu emerjensia faze daruak karik iha sidadaun balun tama mai tan nune’e, fatin hirak ne’ebé iha bele hamoos hotu.
“Agora ba oin depende ba ita nia komunidade balun no estudante sira karik balun sei iha liur, ita nakloke nafatin ba sira. Agora ita konsentra iha Hotel Oel-Upun, maibé futuru sei iha atu mai tan, ha’u hanoin fatin sira ne sei iha nafatin,” Caet esplika.
Entretantu, antes ne’e iha ema hamutuk nain 154 mak kumpre konfinamentu (kuarentena) obrigatóriu iha Ambeno, hafoin hala’o teste laboratóriu ikus mai hatudu maioria negativu no balun kumpre ona loron 14. Nune’e, iha loron 27 Abril liuba, ekipa COVID-19 Ambeno reintegra ema hamutuk nain 135 ba sira nia familia, no falta nain 17 mak oras ne’e sei kontinua kumpre loron 14 iha sentru akollimentu Hotel Fitun Lima iha Oel-Upun, Oe-Kusi Ambeno.
Author: Abilio Elo NiniWebsite:www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
