Ema nain 25 iha Ambeno tenke selu $500 maka bele livre husi kuarentena

AMBENO (TOP) – Sidadaun kuarentena hamutuk nain 25 husi aldeia Saben, suku Bobometo, sub-rejiaun Oe-Silo iha Oe-Kusi Ambeno ohin kompleta ona loron 14, maibé seidauk bele sai, tanba tenke selu lai osan ho valor $500 mak foin bele sai.

Tuir informasaun ne’ebé The Oe-Kusi Post (TOP) asesu, Unidade Polisia Fronteira (UPF) ka’er sidadaun hirak ne’e iha sira nia uma rasik iha loron 17 Janeiru 2021, no direitamente hatama sira ba fatin kuarentena iha hotel fitun lima iha Oe-Upu, Oe-Kusi Ambeno. Ohin kompleta ona loron 14, maibé Serketariu Rejional ba assuntu Saúde Manuel da Costa seidauk bele hasai sira molok selu osan hamutuk $500.

Durante loron 14 mós ema nain 23 lahetan hahan husi autoridade Oe-Kusi Ambeno, labarik nain 2 de’it maka hetan hahan.

“Durante loron 14 to’o ohin ami nunka hetan hahan husi governu, no ohin ami kompleta ona loron 14, maibé tenke selu osan hamutuk $500 maka foin bele sai,” hateten sidadaun kuarentena Armando Lelan via kontaktu telemovél ba TOP, Domingu 24 Janeiru 2021.

“Governu dehan atu selu osan $500, maibé ami dehan ami nia osan laiha, hatama ami ba prijaun de’it ona,” afirma sidadaun kuarentena ne’e.

Nia hatutan, familia sira maka durante loro 14 fo hahan ba sira iha kuarentena laran.

Sidadaun kuarentena ne’e esplika, UPF ka’er sira, tanba rona informasaun husi mau-huu sira katak ema sira ne’e involve iha tranzasaun illegal iha área fronteira entre Oe-Silo ho Napan.

“UPF sira ka’er ami iha uma, la’os ka’er iha fronteira,” Lelan esplika.

Medida sira ba ezekusaun estadu emerjénsia nian, ne’ebé renova husi Dekretu Prezidente Repúblika nian N. 73/2020, loron 30 fulan-dezembru 2020 katak, kontinua bandu ema atu hakat liu fronteira atu halo tradisaun ka kostume ka atu hetan asesu ba merkadu reguladu sira, ninia sansaun sira mantein. Ema estranjeiru ne’ebé hakarak tama iha territóriu nasionál, liuhusi fronteira rai-maran nian, sujeita nafatin ba autorizasaun prévia. Ministru Interiór, liuhusi diploma ministeriál, bele determina atu taka temporariamente postu fronteira sira ka hamenus oráriu ba atendimentu públiku iha postu hirak ne’e.

Nune’e, Serketariu Rejional ba assuntu Saúde Manuel da Costa rekoñese, ema nain 25 tenke selu osan hamutuk $500, no durante loron 14 mós governu la fó hahan duni.

“Sim ne’e razaun autoridade nian liga ho Covid-19 ne’ebé mak agora ita iha tanba sira halo tranzasaun ilegal iha fronteira sira,” hateten Manuel da Costa via kontaktu telemovél ba TOP ohin.

Eis administrador Hospital Referal Oe-Kusi Ambeno ne’e akuza sidadaun nain 25 ne’e halo movimentu tranzasaun illegal iha área fronteira.

Nia esplika lei Estadu emerjensia nian ne’e bazeia ba dekretu Prezidensial número 70/12/2020 katak sei aplika koima ba sidadaun ne’ebé maka tama-sai illegal iha área fronteira ho valor entre $30.00 to’o $250.00

“Agora atu selu koima ka multa ne’e parte ba imigrasaun maka sei implementa koima ne’e bazeia ba lei ne’ebé iha,” nia esplika.

Nia rekoñese, tuir lolos ohin tenke sai ona husi kuarentena, maibé dalaruma segunda ka Tersa semana oin maka bele sai, tanba sei diskuti hela montante koima ne’e hodi aplika ba sidadaun kuarentena hirak ne’e.

“Tuir lolos ohin komu iha imigrasaun sedauk finaliza implementa koima ba sira entaun, ita fó hatene sira atu adia tan tempu loron 2 ka 3 ba oin hodi nune’e parte imigrasaun bele halo koima ba pasajeirus ne’ebé maka iha hotel Oe-upun nian,” Manuel da Costa afirma.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter