Empreza Mira Mar domina projetu fura bee-moos iha Ambeno

AMBENO (TOP) – Empreza Mira Mar domina projetu fura bee-moos iha Rejiaun Administrativu Espesial Oe-Kusi Ambeno (RAEOA) hodi halakon empreza sira seluk.

Tuir dokumentu tenderizasaun ne’ebé The Oe-Kusi Post (TOP) asesu, tenderizasaun ba projetu Konstrusaun no Perfurasaun ba Sistema Distribuisaun Bee Moos iha Sub-rejiaun RAEOA (Construction and Drilling of Clean Water Supply System in Sub-Regions of RAEOA-ZEESM TL) hahu loke ba públiku iha loron 9 Novembru 2020, no 1 Dezembru 2020 nu’udar loron ikus hatama dokumentu sira. Iha empreza hamutuk 22 maka kompete iha projetu ne’e ho númeru referénsia 150/UAR/SRF/VII/2020.

Nune’e, iha loron 28 Dezembru 2020, Sekretária Rejional Finansas RAEOA Elisa Maria Maniquin anunsia rezultadu tender ba projetu Konstrusaun no Perfurasaun ba Sistema Distribuisaun Bee Moos iha Sub-rejiaun RAEOA hamutuk projetu hitu (7). Husi projetu 7 ne’e, empreza Mira Mar Unipesoal Lda hetan kedas fatin tolu, no fatin ha’at sira seluk ba empreza local sira iha Ambeno.

Projetu fatin tolu ne’ebé Mira Mar hetan maka hanesan, iha Nusla’o, suku Bobokase, sub-rejiaun Pante Makassar ho valor kontratu $448,655.15, Aenmat, Usapi-Bela, Pante Makassar ho valor kontratu $548,440.13, no iha Noel-Ekat, suku Bobometo, Sub-rejiaun Oe-Silo ho valor kontratu $516,861.66. Mira Mar hetan projetu sira ne’e iha Lot-1, lot-2, no lot-6 ho valor kontratu ketak-ketak.

Lot-3 lokaliza iha Sonam-Nasi, suku Cunha, sub-rejiaun Pante Makasar manan husi kompañia Nun Mabun Unipesoal Lda ho valor kontratu $156,325.73.

Lot-4 iha Oe-Nunu, suku Suni-Ufe, sub-rejiaun Nitibe manan husi empreza Dacber Unipesoal.Lda ho nia montante orsamentu hamutuk $273,074.06. Lot-5 iha Nemun, sub-rejiaun Pante Makasar manan husi empreza Noe Mnasi Unipesoal.Lda ho nia valor kontratu $155,821.85. No, Lot-7 lokaliza iha Noa Ana, suku Lela-Ufe, sub-rejiaun Nitibe ne’ebé manan husi kompañia Am-Lichoe Unipesoal. Lda ho valor kontratu $494,727.59.

Hafoin anunsia rezultadu tenderizasaun ne’e, mosu komentariu balun ne’ebé sente la satisfeitu ho rezultadu ne’e, tanba tuir loloos kompañia ida hetan de’it projetu ida iha fatin ida, la’os kompañia ida hetan kedas projetu tolu iha fatin tolu, maibé Prezidente Autoridade ba Rejiaun Administrativu Espesial Oe-Kusi Ambeno (RAEOA) Arsenio Paixão Bano esplika, lei aprovizionamentu RAEOA fó dalan ba kompañia ida bele manan projetu barak iha fatin barak, no husu ba sira ne’ebé la satisfas ho rezultadu ne’e bele hato’o reklamasaun molok kontrusaun sira hahu, maibé durasaun tempu atu hato’o reklamasaun mós hotu tiha ona, tanba lei fó tempu loron 5 de’it hodi hato’o karta protesta hafoin rezultadu tender ne’e fó sai.

“Lei autoriza kompañia ida bele manan fatin tolu iha tenderizasaun ida, ne’e ha’u simu de’it husi tekniku sira rekomenda se maka manan, ha’u la inventa sasan iha ne’e,” hateten Bano ba TOP iha Oe-Bau, Oe-Kusi Ambeno, Segunda 11 Janeiru 2021.

“Se ema iha liur hakarak protesta, lei ne’e mós fó dalan kuandu ita públika loron 5 hatama reklamasaun, no ha’u hare sira protesta ne’e sira la tuir tenderizasaun maka protesta fali, ne’e mós laloos ida. Ema la tuir tender maka protesta, no ita protesta fali liu husi Facebook ne’e ita la rezolve problema, hakarak protesta hakerek surat ba ha’u, ha’u haruka tekniku sira responde,” Bano afirma.

Ses husi rezultadu tenderizasaun ne’e, iha loron Segunda 11 Janeiru 2021, Prezidente Autoridade ho nia membru sira mós ba halo fiskalizasaun ba projetu sistema rehabilitasaun no expansaun bee-moos iha aldeia Baki, suku Naimeko, sub-rejiaun Pante Makasar, no ida iha bairu Numbei, aldeia Sanane, suku Costa – Pante Makassar.

Projetu ida ne’e atu fasilita bee moos ba komunidade sira hamutuk uma kain 150 iha suku Naimeko, no uma kain 60 iha Numbei. Projetu 2 ne’e sei fornese bee moos ho volume litru 10.000 ba uma kain sira.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter