GROTU (TOP) – Premiadu Nobel ba Paz, José Manuel Ramos Horta husu ba inan doben sira iha teritóriu nasionál katak bainhira bebe ida moris labele fó susu ben ne’ebé fa’an iha loja super-merkadu sira ka susu ben formula, tanba laiha nutrisaun di’ak, maibé tenke fó susu been kinur ka susu ben orijinal husi inan sira.
Horta hatutan, pandemia Covid-19 ne’e la’os lori de’it impaktu negativu ba nasaun ki’iak sira iha mundu, maibé lori impaktu mós ba nasaun riku sira iha mundu. Impaktu ne’e liliu ba labarik ki’ik sira ne’ebé foin moris.
Tanba ne’e, tuir Horta katak, foin lalais Prezidente Banku Mundial, no Fundu Monetariu Internasional atu tau osan ba labarik sira. Entaun, iha Timor-Leste, governu tenke tau matan uluk ho urjente hodi fó nutrisaun infantil ba inan sira, tanba inan sira tenke iha saúde di’ak hodi fó susu ben ba nia oan.
“Ha’u hakarak aproveita hodi hatete ba inan sira hotu, se inan sira iha susu ben rasik favór fó susu ben rasik ba oan. Labele sosa fali formula iha merkadu ne’e. Ne’e la di’ak liu ba labarik sira,” hateten Horta bainhira akompana Kay Rala Xanana Gusmao halo asaun karidade no sosializa medida prevensaun Covid-19 ba komunidade sira iha suku Grotu, postu, munisipiu Manufahi foin lalais.
“A’at liutan kuandu ita kahur formula ne’e ho bee foer, bee ne’ebé la nono, ida ita osan laiha ita sosa formula ne’e atu poupa para labele gasta barak em vez tau tuir instrusaun ne’e ita tau menus tan, ne’e mak labarik sira kabun moras,” Horta esplika.
