Aniceto Guterres hakarak “hamoos” tiha planu Xanana Gusmão

DILI (TOP) — Prezidente Parlamentu Nasionál, Deputadu Aniceto Longuinhos Guterres Lopes, propoin ona hodi “hamoos” tiha Planu Estratejiku ba Dezenvolvimentu Nasionál (PEDN) ne’ebé produz husi governasaun Kay Rala Xanana Gusmão iha tinan 2011, tanba durante tinan 18 gasta osan mina-rai hamutuk billaun $14, maibé laiha rezultadu.

"Hatudu frakeza iha setór agrikultura, tenke rekoñese ita-nia frakeza no remodela meta sira iha Planu Estratéjiku Dezenvolvimentu Nasionál. Iha-ne’e ita hotu konjuga ita-nia potensialidade tomak hodi foti medida adekuada, haree fila-fali polítika, medida ne’ebé iha ona no revé meta iha Planu Estratéjiku Dezenvolvimentu Nasionál,” Aniceto Guterres deklara asuntu ne’e iha ámbitu selebrasaun loron mundiál ai-haan, iha Sentru Konvensaun Dili, Sesta 16 Outubru 2020.

Nia dehan, oras ne’e preokupasaun boot liu maka pandemia Covid-19 ne’ebé hamoris krize saúde mundiál, redús atividade ekonómika iha produsaun agríkola.

Nia afirma, situasaun ne’e potensialmente kontribui ka haboot vulnerabilidade hamlaha no haboot má-nutrisaun. Krize saúde, hamlaha no mál-nutrisaun nu’udar keda (queda) nasionál ne’ebé la deside opsaun polítika.

Prezidente Parlamentu Nasionál esplika, Planu Estratéjiku Dezenvolvimentu Nasionál determina to’o 2030 Timor-Leste sei livre hosi hamlaha, má-nutrisaun hodi atinje moris saudável tanba iha PEDN konsidera seguransa alimentár no nutrisionál nu’udar prioridade ida iha dezenvolvimentu nasionál.

Aniceto Guterres subliña, ho situasaun hirak ne’e tenke hatudu vontade no kompromisu polítika tenke forte no koordenadu hodi hasoru keda (queda) nasionál ida-ne’e.

Prezidente Parlamentu Nasionál akresenta, polítika seguransa alimentár ne’ebé elabora iha 2005 iha mandatu I Governu Konstitusionál no tinan 2014 Timor-Leste hamutuk nasaun CPLP sira lansa planu asaun nasionál zero fome iha reuniaun xefe estadu CPLP nian.

Nune’e iha 2017 governu aprova polítika ba seguransa alimentár, nutrisionál no soberania ai-haan iha Timor-Leste.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE