DILI (TOP) — Ministériu Agrikulta no Peska (MAP) iha tinan ida ne’e hetan osan hamutuk $7.265,085, no metadu husi orsamentu ne’e sei selu de’it tusan sira durante ne’e.
OJE 2020 ba MAP aprova tiha ona husi deptadu sira iha Parlamentu Nasionál (PN) iha loron Kuarta 7 Outubru 2020 ho votu afavór 44, deputadu nain maka kontra no nain 11 hili abstensaun.
Osa ne’e fahe ba saláriu no vensimentu hamutuk millaun $3.471,102, bens millaun $3.567,543, kapitál minór $ 116,445 no kapitál dezenvolvimentu $ 109,997.
MAP Pedro dos Reis katak, husi osan millaun $7 resin, nia gasta ona osan hamutuk millaun $5, sei iha millaun $2 mak seidauk gasta.
“Orsamentu 2020 nian ne’e sei selu ba dívida sira-ne’ebé maka iha. Ha’u hanoin dívida ne’e surat tahan naruk tebes, manutensaun, ha’u atu esplika mais ha’u la lembra, maibé dívida barak tebes,” hateten Ministru Pedro ba jornalista sira iha Parlamentu Nasionál Kuarta 7 Outubru 2020.
Governante ne’e hatutan, sei halo esforsu hodi gasta hotu kedas osan sira iha fulan tolu nia laran, Outubru, Novembru no Dezembru.
“Ami-nia ezekusaun kuaze atinje 82%, tanba ne’e hela de’it milaun $2 de’it ona. Orsamentu ne’e halo kontinuasuan ba atividade sira-ne’ebé durante la’o iha dotasaun orsamentu temporaria nia laran," nia esplika.
Entretantu, iha livru planu asaun ne’e dekreve medida prinsipál setoriál hosi MAP nian mak promove hodi aumenta sustentável produsaun no produtividade hodi halo diversifikasaun ba produsaun agríkola, konstribui hodi mellora asesu ba merkadu no valór akresentada sira, asegura jestaun no prezervasaun rekursu naturál sira
Nune’e mós, implementa polítika jéneru, promove boa governasaun no jestaun institusionál ne’ebé tutela ba ministériu refere, fortalese instituisaun no eleva kapasidade rekursu umanu.
