DILI (TOP) – Orsamentu Jeral Estadu (OJE) tinan fiskál 2020 ba Ministériu Agrikultura no Peska (MAP) hamutuk $7.265,085 aprova tiha ona ho votu afavor 44 iha votasaun espesialidade, maibé tenke simu akuzasaun barak husi deputadu sira iha Parlamentu Nasionál kona-ba deskonfia Timoroan balun ne’ebé ho diploma ensinu sekundária sai asesor hodi manan osan hamutuk $5000 kada fulan, maibé Ministru Agrikultura rejeita akuzasaun ne’e.
Molok tama ba votasaun espesialidade, deputadu sira husi bankada CNRT, PD, no UDT kestiona maka’as Timoroan balun ne’ebé ho diploma sekundáriu de’it, maibé deskonfia oras ne’e sai nu’udar asesor iha MAP ho nia saláriu entre $5000 to’o $6000 kada fulan.
"Ami la kestiona ida ne'e, problema ba ami mak ne'e iha asesor balun ho nivel edukasaun SMA simu salariu $5000 ida ne'e maka ami nia problema tanba ida ne'e mak gastus. Aumenta ema nain 24 ho sira nia salariu la'os itoan husi $1200 to'o $6000,” deputada bankada CNRT Virgina Ana Belo levanta assuntu ne’e iha Parlamentu Nasionál, Kuarta 7 Outubru 2020.
Fen kaben husi Diretór Policia Cientifico e Investigação Criminal (PCIC) ne’e laiha dúvida ba assuntu ne’ebé nia kestiona basa tuir nia katak, informasaun ne’e mai duni husi diretór balun husi MAP bainhira halo audiensia ho deputadu sira iha Parlamentu Naisonál foin lalais.
Deputada ne’e dehan, MAP mós planeia ona atu haruka tan funsionáriu públiku permanente nain 24 hodi fó apoiu serbisu iha gabinete ministériu nian inklui ba Sekretáriu Estadu ho estimasaun saláriu ema ida-idak sei hetan entre $1200 to’o $6000 fulan-fulan.
Assuntu hanesan mós sai preokupasaun boot ba deputadu Adriano do Nascimento husi bankada Partidu Demokrátiku (PD).
Deputadu PD husi munisipiu Kovalima ne’e husu esplikasaun ba MAP Pedro Reis atu halo klarifikasaun ba informasaun sira ne’ebé deputadu ne’e hetan katak, iha funsionáriu balun ho diploma sekundária de’it, maibé nia saláriu maka $1500 fulan-fulan.
Se informasaun hirak ne’e maka loos, tuir deputadu ne’ebé antes hakbesik aan ba partidu FRETILIN iha 2018 katak, sei hamosu diskriminasaun boot ba komunidade universitáriu sira, tanba sira hala’o estudu tinan naruk nia laran, maibé to’o ikus governu la utiliza sira.
“Pior liu maka ema sira ne’e ba serbisu iha rai liur. Presija haree tau atensaun ba ema sira ne’ebé iha kapasidade atu nune’e servi estadu ida ne’e ho loloos," deputadu Adriano kestiona.
Hatan ba akuzasaun no kestaun ne’e, Ministru Agrikultura no Peska (MAP), Pedro dos Reis hahu kedas ho resposta diplomasia katak, nia prezensa iha governu atual atu sai nu’udar servidor ida ba povu, no la’os atu fahe osan ba iha nia ministériu laran.
Maske deputada Virginia Ana Belo dehan ona katak informasaun sira ne’e mai husi diretór sira iha MAP, maibé Ministru Pedro fila konvida tan deputadu sira katak karik sente fuan-laran kaman bele hakat kedas ba nia serbisu fatin hodi halo fiskalizasaun direitamente hodi bele hetan resposta loloos husi informasaun sira ne’ebé deputadu sira iha.
“Iha ne’eba hanesan servidor, ami nia odamatan nakloke ba depputadu no deputada sira bele hakat ba iha MAP hodi halo justifikasaun,” Ministru Pedro konvida.
Ministru ne’e defende aan katak, bainhira hahu ona asume kargu ne’e, nia hahu implementa ona politika Timorizasaun katak asesor sira ne’ebé oras ne’e serbisu haleu nia iha MAP mesak Timor-oan de’it, asesor internasional ka asesor sira husi tasi-balun laiha ona.
