DILI (TOP) – Deputada Olinda Guterres husi bankada KHUNTO oras ne’e preokupa tebes kona-ba transferensia osan husi banku Federal Nova Yorke mai Timor-Leste.
"Banku Amérika ne'e osan povu nian maka rai iha ne'ebá, ami rona-fali informasaun ne'e di’ak liu husu ba ita boot para povu bele rona katak aman sira aprova tiha ona osan, maibé osan laiha. Se maka dehan osan laiha?," deputada Olinda kestiona iha plenária Parlamentu Nasionál, Segunda 16 Novembru 2020.
Governador Banku Sentral hatan ba preokupasaun ne'e katak, to’o ohin loron Banku Sentral Timor-Leste laiha informasaun ruma kona-ba impedimentu iha transferensia.
"Tanba governu nia konta iha Banku Sentral, Banku Sentral nia konta maka iha estranjeiru ne'ebá, ne'ebé karik atu transfere mai Timor ne'e só Banku Sentral maka bele hatete dehan osan bele mai ka la mai, tanba konta sira iha estranjeiru ne'e Banku Sentral nian, la’os governu Timor-Leste nian," hatan governador banku sentral Abrão de Vaz Conselhos.
Nia esplika, governu nia osan iha Banku Sentral, ne'ebé Banku Sentral ba investe to’o agora seidauk iha problema ruma, Banku Sentral la nota iha problema ruma para impede osan Timor-Leste labele mai.
Nia konta, bazeia ba esperensia nasaun sira seluk ne'e, kuandu Estadus Unidus Amérika sira halo blokeia konta bankaria husi Estadu ida nian ka instituisaun ida nian, entaun ida ne'e sira labele halo movimentasaun osan. Ida ne'e bele akontese hanesan instituisaun sira ne'ebé mak tama iha blokeia iha tempu pasadu hanesan nasaun Iraunn, Venezuela no nasaun seluk tan.
"Timor-Leste to'o iha ne'ebá karik hanesan buat ruma akontese más dala ida tan la’os governu nia konta ne'ebé atu blokeia karik, la’os governu nia konta, ne'e Banku Sentral nia konta, Banku Sentral ne'e instituisaun ida la’os parte governu nian," nia esplika.
Governador Banku Sentral mós akresenta, Orsamentu Jeral Estadu (OJE) 2021 laiha problema, problema maka la aprova karik ne'e problema tanba levantamentu atu hala’o iha fulan hirak liubá nee Banku Sentral lori hela osan mai Timor-Leste.
"Hau hanoin aproveita para informa ba públiku katak sobre kestaun ida ne'e públiku la presiza tau iha kestaun, dúvida ba kapasidade uza ita nia rekursu ida ne'e la afeita tanba Banku Sentral Timor-Leste nian kontinua garantia serbisu atu apoiu governu Timor-Leste," governador ne'e husu ba públiku.
Entretantu, tuir informasaun balun ne’ebé The Oe-Kusi Post asesu maske Prezidente Repúblika promulga ona OJE 2020 iha fulan hirak liuba, maibé to’o ohin loron osan seidauk tama ba finansa kada ministériu inklui instituisaun autonoma sira.
