COVID-19: Ema Nain 117 Iha Ambeno Sai Ona ba Uma

Xefe Gabinete Prezidente Autoridade ba RAEOA, Agustinho Caet espllika hela ba estudante sira hamutuk nain 32 iha sentru akollimentu Hotel Fitun Lima, Oel-Upun, Oe-Kusi Ambeno, Tersa 21 Abril 2020. Foto Oe-Kusi Post/Abilio Elo Nini.

Oekusipost.com Ambeno – Ema hamutuk nain 117 ne’ebé durante ne’e kumpre hela loron 14 iha sentru akollimentu sira iha Rejiaun Administrativu Espesial Oe-Kusi Ambeno (RAEOA) sai ona hodi ba hela hamutuk ho sira nia familia, tanba durante ne’e la hatudu sintomás.

Xefe Gabinete Prezidente Autoridade ba RAEOA, Agustinho Caet hateten, Prezidente Autoridade nafatin fó fiar ba estudante sira ne’ebé kumpri ona loron 14, no bele sai mensajeiru di’ak ida hodi hato’o informasaun ba komunidade sira kona-bá perigu moras virus corona ne’e rasik.

“Ita nia suaselensia Prezidente Autoridade husu mai ita, katak karik fila ba uma ita boot sira sei sai hanesan promotor atu kontinua habelar tan informasaun ba komunidade tanba imi maioria estudante. Balu eskola saúde públika iha komprensaun ba área saúde nian. Nia husu ita hotu atu serbisu hamutuk hodi prevene,” Agustinho Caet hatutan mensajen Prezidente Autoridade ba RAEOA, José Luis Guterres iha seremónia husik fali ema nain 32 ba sira nia familia iha sentru akollimentu Hotel Fitun Lima iha Oel-Upun, Oe-Kusi Ambeno, Tersa 21 Abril 2020. 



“Ida ne’e la’ós serbisu ema ida nian, maibé ida ne’e serbisu koletivu atu bele asegura katak depois periode emerjénsia ne’e hotu ita bele hatete, katak Oe-Kusi laiha positivu ba Vius Corona,” Caet esplika.

Eis Xefe Gabinete Ministériu Negósiu Estranjeiru no Kooperasaun (MNEK) ne’e hatutan, Prezidente Autoridade ba RAEOA mós agradese ba ekipa COVID-19 tomak iha rai-ketan ne’e, tanba durante ne’e sira serbisu loron-kalan, no serbisu iha liña oin hodi prevene moras COVID-19 ne’e labele da’et ba komunidade sira iha Ambeno.

Iha fatin hanesan, Portavóz ba ekipa prevensaun moras virus corona (COVID-19) iha RAEOA, Luis de Jesus Neno haktuir, estudante ho komunidade sira ne’ebé durante ne’e kumpre loron 14 iha Oe-Kusi Ambeno hamutuk nain 147.

“Husi númeru iha ema nain 85 sai uluk ona, no Tersa ohin iha nain 32, mane 20 no feto nain 12 sai tan ona, tanba ema hirak ne’e rezultadu teste laboratóriu lahatudu sintomas ruma kona-bá COVID-19. No sei iha ema hamutuk nain 32 mak oras ne’e kontinua kumpre loron 14 iha sentru akollimentu sira hanesan iha Hotel-Lifau iha ema nain 5, Hotel Fitun Lima nain 9, no rezidensia Fulolo iha nain 18,” hateten Luis Neno.

Total dadus nasionál iha loron Segunda horseik hatudu, ema hamutuk nain 327 mak sai suspeitu, nain 92 mak hein hela rezultadu teste laboratóriu, ohin tun ba nain 80 nain 5 provavel, maibé ohin tun ba nain 4, nain 22 mak pozitivu, ohin sa’e ba nain 23 no nain 208 mak rezultadu hatudu negativu, ohin sa’e ba 254 inklui nain ida di’ak tiha ona.  

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE