Oekusipost.com Ambeno – Unidade Polisia Fronteira (UPF) iha Rejiaun Administrativu Espesial Oe-Kusi Ambeno (RAEOA) kaptura ema hamutuk nain 14 inklui ki’ik oan ida, tanba deskonfia hatama sasan illegal iha área fronteira Sakato, Oe-Kusi Ambeno.
Ema nain 14 ne’e mai husi Sakato partense ba suku Nipane, postu Pante Macassar ne’ebé baliza ho fronteira Wini (Indonézia).
Tuir ema hirak ne’e katak UPF ka’er sira iha sira nia uma, UPF tama ba sira nia uma ida-idak mak ka’er sira iha oras tuku 12 meudia. UPF mós lalin hotu kedas populasaun nia sasan sira hanesan jerigen, bidon mamuk balun hodi ba tau hotu iha postu UPF iha Oe-Kusi villa, no ema nain 14 ne’e lori kedas ba iha sentru akollimentu Hotel Fitun Lima iha Oel-Upun hodi koko sira nia temperatura isin, no hasai ran. Liu tiha ida ne’e, sira mós hetan ai-moruk prevensaun moras virus corona (COVID-19) husi pessoal saúde sira iha rai-ketan (enklave) ne’e.
Hafoin prosesu ne’e, ikus mai ema nain 13 mak livre hodi ba fali sira nia horik-fatin iha Sakato, no nain ida de’it mak oras ne’e hela iha sentru akollimentu hodi kumpre loron 14, tanba nia rasik mak deklara durante ne’e nia la’o tama-sai Sakato-Wini hodi hatama sasan.
Responsavél Médiku ba sentru akollimentu Hotel Fitun Lima, dotor Tito Baptista Anuno katak, entre nain 14 ne’e, ida mak hela iha sentru akollimentu ne’e durante loron 14 mak sai fali karik laiha sintomas ruma kona-bá moras COVID-19, tanba nia rasik mak konfesa katak durante ne’e nia la’o tama-sai Sakato-Wini.
“Ida hela, klaru laiha buat ruma, maibé ohin ami identifika ida-idak fó hatene katak ema ida ne’e mak durante ne’e tama-sai, tanba ne’e ami hatama nia hodi kumpri lai loron 14m,” esplika dotor Tito.
Maske nune’e, komunidade sira la satisfas ba kapturasaun ne’e, tanba UPF ka’er sira derepente de’it tama-sai uma, ho loron manas boot.
Mercinana Saet Suni hateten, tuir loloos kaptura iha fronteira, la’ós tama buka ema iha nia kuartu laran hodi obriga nia atu konfesa nia sala ida-idak.
“Ohin UPF sira ka’er ami iha Sakato. Loloos ne’e labele, tanba durante Estadu emerjénsia ne’e ita hotu hakmatek iha uma, maibé nusa mak ohin ka’er de’it ami, no laiha evidensia. Sira deskonfia de’it ami katak, ami hatama sasan gazoliña liu husi dalan illegal maske ami la hatama ida,” hateten Suni ba Oe-Kusi Post iha sentru akollimentu Hotel Fitun Lima, Oel-Upun, Oe-Kusi Ambeno, Segunda 20 Abril 2020.
Nia hatutan, durante ne’e ema hotu hakmatek, sira la sai ba liur, tanba Estadu bandu sidadaun ida labele hala’o movimentu tama-sai liu husi fronteira tanba tauk moras ida ne’e da’et.
Melquiano Abi mós la konkorda ho atuasaun UPF sira nian, tanba tama ba uma laran revista ema nia sasan arbiru de’it, maske komunidade sira ne’e la halo tranzaksaun illegal durante Estadu emerjénsia.
“Sira ba tama to’o ami nia kuartu laran balu toba mós dehan hader. Sira husu ami dehan mina iha ne’ebé, maibé ami lahatene ida,” nia konta.
Entretantu, komandante polisia RAEOA, Superintendente Xefe Arnaldo de Jesus Araújo laiha koñesementu kona-bá kestaun ne’e.
“Baibain kuandu kaptura ona ne’e sira mai entrega sasan hanesan mina ka buat seluk, maibé agora ami seidauk hatene kona ba kapturasaun ne’e,” nia hateten.
The Oe-Kusi Post (TOP) mós tenta on aba komandante UPF RAEOA, maibé komandante laiha fatin.
